INJABULO KUBEKWA INKOSI NGEMUVA KOMDONSISWANO
UFINYELELE ekugcineni umdonsiswano nokungaboni ngasolinye ngokubekwa kwenkosi yakwaHlabisa, KwaHlabisa, obesekuphele iminyaka ibanjelwe isihlalo.
Ngeledlule kubekwe ngokusemthethweni iNkosi Nhlanganiso kaLwazi kaPhumempini Hlabisa (20) emcimbini obuseMatshamnyama, KwaHlabisa.
Inkosi ibekwa nje, kuke kwaba nomdonsiswano phambilini kufanele kubekwe obezoyibambela kwazise ibisencane ngesikhathi kukhothama uyise ngo-2005, iNkosi uLwazi - kugcine kubekwe uyisekazi, uNkz Jabu Hlabisa.
ILANGA lithole ngomthombo walo ukuthi lokhu kakwehlanga kahle kwamanye amalungu omndeni njengoba wona abephakamise umnewabo wenkosi ekhotheme, uMnu Khulezweni Hlabisa.
Yize kunjalo, uMnyango wezokuBusa ngokuBambisana nezoMdabu KwaZulu-Natal - ngaphansi kobuholi bukaMnu Mike Mabuyakhulu, obengungqongqoshe ngaleso sikhathi, wamukele uNkz Hlabisa ukuba abambe lesi sihlalo kuze kube iyakhula inkosi.
UMnu Sbonakaliso Hlabisa, ongusihlalo wamaNgotsha, (okuyisithakazelo sakwaHlabisa), uthi kubajabulise kakhulu ukubekwa ngokusemthethweni kweNkosi uNhlanganiso.
Utshele ILANGA ukuthi banethemba lokuthi lokhu kuzoqeda lonke uqhekeko nomdonsiswano obukhona emndenini.
Uthembise nesizwe sonke ukuthi konke kuzobuyela esimeni.
Okhulumela uMnyango wezokuBusa ngokuBambisana nezoMdabu KwaZulu-Natal, uMnu Msawakhe Mayisela, uthi umnyango uyihambisile incwadi egunyaza ukuba kubekwe iNkosi uNhlanganiso.
Uthi nobebambile uzobhalelwa incwadi embongayo ngokubamba isihlalo kuze kube kubekwa inkosi.