Mayibhekisiswe eyeminyaka yesipiliyoni
MHLELI: bengicela kwabohlanga sibheke emuva lapho sisuka khona ukuthi ngabe sisayibambe ngakho noma isisiphunyukile, isidla utshani. Ake sibheke isimo phansi kwalezi zihloko ezilandelayo.
Imisebenzi, ubugebengu, ezokuhlaliswa kwabantu nomhlaba, abohlanga. Ngike ngizibuze ukuthi ngempela imbangela yokusweleka kwemisebenzi ngabe idalwa yini. Ngike ngibone izikhangiso zemisebenzi emaphephandabeni ziziningi futhi zisho imiholo nemihlomulo emihle bese ngixakeka ukuthi pho kungani izingane zakwethu zihlala zikhala ngokungaqasheki zibe zifundile. Uma ulandelisisa isikhalo sazo, zikhala ngesipiliyoni.
Ngingufakazi walokho ngoba ngiye ngibone ezikhangisweni kufuneka abanolwazi lweminyaka ewu-3,5 kuya ku-7 lwalowo msebenzi. Bekungabanjani uma besingacela kuhulumeni wethu uke ubhekelele abafowethu nodadewethu abahleli neziqu zabo emakhaya ngenxa yesipiliyoni esingekho, esidingwa yimisebenzi abayifundele?
Benginombono othi njengoba uhulumeni ukwazi ukunikeza izibonelelo emiphakathini ehlwempu, nabo mawuzame ukuba umuntu ngamunye ngokomsebe- nzi awufundele, athole lelo thuba lokusebenza esizana nasebemnkantshubomvu ukuze bathole lesi sipiliyoni esiwumgoqo ekubeni baqasheke. Ngicabanga ukuthi singabasiza leso sibonelelo sokuba bakwazi ukuzibheka besafuna lesi sipiliyoni.
Ngicabanga ukuthi imbangela yobugebengu yikhona ukusweleka kwemisebenzi, yize singephike ukuthi nokufuna imali esheshayo nobuvila kunomthelela ebugebengwini. Okunye okuba yinkinga, wukuhlaliswa kwabantu ezindaweni ezingakulungele ukuhlala abantu, isibonelo:- izindawo ezingahlelekile ezingenawo ugesi, amanzi, ukuthuthwa kwendle nemigwaqo.
Uma ngikhumbula kahle, indawo ekulungele ukuhlalisa umphakathi iqala ihlolwe ngochwepheshe ukuthi kukhonani phansi nokuthi kumele izakhiwo zibe wuhlobo olunjani.
Umhlaba zingane zakwethu ukhona, ubanzi, inkinga wukuthi siyakwazi yini ukuwusebenzisa. Masingafani nomuntu othenga imoto engakwazi ukushayela igcine isisetshenziswa ngabakwaziyo, ingabi nanzuzo kuyena.
Bengingacela singabohlanga sike sihlukane nobuvila nokufuna ukwenzelwa wuhulumeni ngaso sonke isikhathi, asiwulekeleleni ukuze nawo usisize kwesikuvezayo. Sasingavoteli ukuhlala sikhangezwa wuhulumeni, sasivotela ukuba sikhululeke. Uhulumeni ake usilalele uma sikhononda kungaze kushiswe izakhiwo zomphakathi kube yima ulalela.
Lokho kukodwa nje, kusiphindisela emuva ngoba kusasa uzothi kawunamali yokusisiza, usalungisa umonakalo odaleke ngesikhathi kubhikishelwa izimfuno zomphakathi. Ngiyanicela bafowethu nodadewethu, isikhathi sokushisa nokulimaza izinsiza sesadlula, akusezona izikhathi zobandlululo sekungezethu, yimali yabakhokhi bentela esidlala ngayo.
Ake sibe nezinye izindlela zokukhononda. Masingazitholi sesifana namanye amazwe ase-Afrika ngobuphofu ngoba nawo ayAfana nathi. Kangazi noma kumele ngivumelane yini nabathi abohlanga kabakwazi ukuzimela bebodwa.
Masiqapheleni zingane zakwethu singazibulali sibhekile, sesikhululekile manje masiyibambeni ingasiphunyuki. Abakuhulumeni mabangazinothisi bona nemindeni yabo, balapho nje bathunywe yithina, mabenze abakuthunyiwe.