Lezi zehlakalo seziyawudida noMnyango wezeMfundo
CISHE izwe lonke lisashaqekile futhi kaliwuvali umlomo ngezingane zamantombzane ezimbili ezibonakala ezinkundleni zokuxhumana ( social media), zishaya uthisha wesifazane. Izehlo ezifana nalesi sekuyinto eyejwayelekile ezweni, kodwa noma kunjalo, ziyethusa.
Umbuzo osezindebeni zabaningi, uthi kuzokwenziwa njani uma sekonakele kanje, abafundi beqhubeka begibela emakhanda othisha ezikoleni. Okuya kucaca wukuthi umnyango wezemfundo nawo ubukeka ungazi ukuthi kufanele kwenziwe njani. Inkinga ngaleli lizwe lakithi wukuthi sibuye sibe ngamathatha, sijahe ukushaya imithetho elungele amazwe athuthukile asentshonalanga, singahlaziyi ukuthi ngabe ililungele yini izwe lethu elisathuthuka.
Yebo, kuyiqiniso khona ukuthi eminye imithetho yamazwe asentshonalanga mihle, kodwa hhayi yonke. Emuva kokungena kombuso wentando yeningi, uhulumeni washaya umthetho wokuqeda ukujeziswa kwabafundi ngenduku ngothisha, uma bonile, kwathi nenkantolo yomthethosisekelo yavumelana nalesi sinqumo. Kwathiwa ukuqedwa kokujeziswa ngoswazi ezikoleni kuhambisana nokuvikelwa kwamalungelo abantu.
Inkinga esivele emuva kwalesi sinqumo wukuthi izindlela ezintsha ezibekwe wuhulumeni zokukhalima abafundi abanhlanhlathayo, kaziqinile ngokwanele ukuqondisa indlela yokuziphatha ezikoleni. Kasisho ukuthi makubuyiswe induku ezikoleni, kodwa iqiniso lithi selokhu yayekwa ukusetshenziswa, abafundi sebezenzela umathanda. Uma ungabuza kothisha bazokutshela ukuthi bazizwa beboshwe izandla ngoba kabasakwazi ukujezisa abafundi abaphambuka endleleni, ngakho abanye sebevele bazibukele nje, kukhule nokhula.
Abanye abafundi kabasazihluphi ngokwenza umsebenzi wesikole, bayalova futhi bazenzela abakuthandayo, ngesikhathi abasithandayo. Ukushaywa kothisha abazama ukukhuza umhlola, kuya kwanda ezikoleni. Empeleni kunzima ukuba nguthisha kulezi zinsuku, yingakho abanye babo beqoma ukuphosa ithawula singakashayi isikhathi sokuthatha impesheni ngoba sebekhathele wukugitshelwa yizingane emakhanda. Lesi yisimo esibi, esilimaza imfundo ngoba kokunye sisho ukushiya emsebenzini singakafiki isikhathi esifanele kothisha abaqeqeshiwe futhi abawaziyo umsebenzi.
Uhulumeni, okufanele ngabe uyahlaziya, ubuyekeze okwenzekayo ezikoleni ngenhloso yokulungisa isimo, ugoqe izandla. Okwenzekayo kuchaza ukuthi nabazali sebeyehluleka ukukhulisa izingane zabo ngendlela eyiyo ngoba ingane ekhuliswe kahle ngeke iqophisane, ize ishaye umuntu omdala.
Sihlaba ikhwelo lokuba umnyango wezemfundo mawuthathe izinyathelo ezibonakalayo ukulungisa isimo, kungaze kuphume isidumbu ngelinye ilanga. Umfundi oshaya uthisha kufanele ajeze ngokufanele, kungabekwa phambili amalungelo engane kuphela, kuthi ukuhlukumezeka kukathisha kushaywe indiva.
Kungaba kuhle ukuba lo thisha oshayiwe avule icala emaphoyiseni, khona lezi zingane ezimshayile zizoshushiswa, zigwetshwe yinkantolo uma izithola zinecala. Mhlawumbe lokhu kungaba yisibonelo nakwabanye abafundi ngemiphumela yokwedelela nokuphakamisela isandla umuntu omdala.