Kuvuka inkinga endala ngeSafa eThekwini
Ihambisa amakilabhu amabili kweyeSAB League
UNgwenya usanda kukhethwa njengoSihlalo weSafa esifundazweni...
KUVUKA inkinga endala yokuyiswa kwamakilabhu amabili aseThekwini emidlalweni yeSAB League KwaZulu-Natal ezoqala kusasa ngoLwesihlanu isongwe ngeSonto eVryheid.
ITheku linezinhlaka ezimbili zeSAB League, njengoba kukhona ehlelwa nguKwenzakwakhe Ngwenya ojutshwe yiSouth African Football Association (Safa) kuzwelonke neyeSafa eThekwini Region engaphansi kuka-Alpha Mchunu ( osesitho
mbeni) abazinze eHoy Park. UNgwenya ukhiphe iKwaDabeka Sporting, kanti iSafa eThekwini ikhiphe iMetro Stars. UNgwenya uthi iSafa eThekwini, kayikaze iyidlalise imidlao yeSAB League. Uthi kayikho ikilabhu ezovunyelwa ukudlala ekubeni ingabhalisiwe ohlelweni lweMy Safa. Ngakolunye uhlangothi, u-Eric Smith weSafa eThekwini, uthi incwadi yakamuva evela kwiSafa kuzwelonke egcizelela ukuthi iyabemukela ubuholi baseThekwini, ikubeka kucace ukuthi yibona okumele bahambise ikilabhu emidlalweni yokuhlunga. USmith uthi iSafa kuzwelonke kuzomele icacise ukuthi wenzani uNgwenya eThekwini njengoba ibabhalele incwadi ebamukelayo njengobuholi baseThekwini.
UNgwenya nguyena onguSihlalo wekomidi lemiqhudelwano yeSafa KwaZulu-Natal, okuhumusheka ngokuthi kungenzeka kukhale isicathulo sakhe ngekilabhu ezomela iTheku. UNgwenya usanda kukhethwa njengoSihlalo weSafa esifundazweni, okumnike ithikithi lokuba yilungu lesigungu sikazwelonke seSafa.
Amakilabhu amabili azofinyelela kowamanqamu kwiSAB League, azokhushulelwa kwiSafa KwaZuluNatal ABC Motsepe League. Amakilabhu eMotsepe League abengaphelele ngesizini edlule ngenxa yenkinga yokuthi iTheku lihambise amakilabhu amabili, okuholele ekutheni kujikijelwane ezinkantolo.
ISafa eThekwini ihambisa amakilabhu amabili nje, ngesizini edlule isigaba seSafa KZN ABC Motsepe League besinamakilabhu angu-15 esikhundleni sangu-16 ngenxa yawo umbango wamandla oqhubeka kulesi sifunda esithathwa njengesikhulukazi KwaZuluNatal njengoba kuyisona kuphela esivakashelwa yiBafana Bafana ukuzodlala imidlalo kusona ngenxa yokuba nezinkundla ezisezingeni lomhlaba.