UQINISE ABALANDELI IDOLO OWE-FRANCE
PHANSI amaphaphu ngoKylian Mbappe ongumgadli weFrance okubhekwe lukhulu kuyena kwiNdebe yoMhlaba eqala namuhla ngoLwesine isongwe mhla ka-15 enyangeni ezayo eRussia.
Lo mgadli oneminyaka engu-19 ubudala, uphoqeleke ukushiya phakathi ejimini ngoLwesibili ngenxa yokulimala ngesikhathi emakana no-Adil Rami.
UMbappe uhlohle amagoli angu-21 wakhanda angu-16 emidlalweni engu-46 ngesikhathi ikilabhu yakhe, iParis SaintGermain (PSG), inqoba izindebe ezintathu ngesizini edlule.
Lo mgadli useva-lele amagoli amane wakhanda ayisihlanu emidlalweni engu-15 yeqembu lesizwe aqale ukulidlalela ngonyaka odlule.
“Abantu abakhululeke. Angilimalanga kakhulu, kodwa kube wukuthinteka nje okungatheni.
"Abaqeqeshi bathe angihlale ngaphandle ukugwema ukuthi ngingathunukali. Ngikhona kwiNdebe yoMhlaba, futhi ngiyi- bheke ngabomvu. U-Adil ubengaqondile ukungilimaza, kube yiphutha nje,” kusho lo mgadli okulindeleke ukuba adlale ngokubambisana no-Antoine Griezmann ( osesithombeni). IFrance ivula imidlalo yamaqoqo ngokududulana neAustralia ngoMgqibelo ngo12h00. I-Egypt yase-Afrika, isenki-ngeni njengoba emakhulu amathuba okubhekana neUruguay kusasa ngoLwesihlanu ngo-14h00, ngaphandle kukaMohamed Salah olimele ihlombe. Lo mdlali weLiverpool yase-England, ulimale kowamanqamu we-Uefa Champions League behlulwa yiReal Madrid yaseSpain ngo-3-1 kowamanqamu. IMorocco okungelinye lamazwe amele i-Afrika, izovula eyamaqoqo ne-Iran kusasa ngo-17h00, kuthi iNigeria nayo yase-Afrika, ivule neCroatia ngoMgqibelo ngo-21h00. ITunisia izovula ne-England ngoMsombuluko ngo-20h00.