IZODLALELWA E-USA EYOMHLABA KA-2026

I-AFRIKA iphuthwe yithuba lokusingatha imidlalo yeNdebe yoMhlaba yango-2026 ngesikhathi iMorocco ikhala ngaphansi emazweni abeholwa yi-United States of America (USA) ngesikhathi kuvotwa izolo ngoLwesithathu eRussia.

Le midlalo izosingathwa yi-USA, iMexico neCanada. Kule midlalo kuzokube kuqala ukuthi kudlale amazwe angu-48, kanti imidlalo izokuba ngu-80 seyiyonke. Amazwe aholwa yi-USA athole amavoti angu-134, kwathi iMorocco yathola angu-65.

ISouth African Football Association (Safa) eholwa nguDanny Jordaan, iyalelwe nguhulumeni wakuleli ukungayivoteli iMorocco. INingizimu Afrika yilona kuphela izwe lase-Afrika eselike lasingatha imidlalo yeNdebe yoMhlaba njengoba ibikuleli ngo-2010.

Amazwe amaningi ase-Afrika avotele amazwe aholwa yi-USA ngenxa yokukhangeza kwi-USA kwezomnotho.

UDonald Trump onguMengameli wase-USA, ubevele ewabambe ngobhongwane amazwe ancike kwi-USA kwezomnotho ukuba avotele bona.

Ukuvotwa kwenziwe eRussia ngenxa yokuthi yiyona esingethe iNdebe yoMhlaba eqala namuhla.

IRussia izoshukana neSaudi Arabia namuhla ngo-17h00 kowokuvula.

I-USA igcine ukusingatha le midlalo ngo-1994 ngesikhathi lo mqhudelwano unqotshwa yiBrazil ngokunenebula i-Italy ngo-3-2 sekukhahlelwa amaphenathi. Nakuba i-USA ibalwa namazwe acebe kakhulu emhlabeni kodwa kayikaze iyinuke inkomishi yeNdebe yoMhlaba.