I-ASA IMEMEZELE ABAZOMELA ELAKULELI KWEYASE-LONDON
INHLANGANO eyengamele ezokusubatha kuleli, i-Athletics South Africa (ASA), imemezele isikwati esizomela elakuleli kwi-Athletics World Cup ezokuba seLondon, e-England kusuka mhla ka-14 isongwe mhla ka-15 kuNtulikazi (July).
Lesi sikwati simenyezelwe izolo ngoLwesine emini nguMengameli we-ASA, u-Aleck Skhosana. Sibophele abasubathi abahlonishwayo emhlabeni okungabalwa kubona uLuvo Manyonga owenza iLong Jump, u-Akani Simbine onamandla kwi-100m noSunette Viljoen owenza iJavelin.
Elakuleli lizokube libhekene namaqembu asuka e-United States of America (USA), ePoland, eChina, eGermany, eFrance, eJamaica naseGreat Britain & Northern Ireland ukukha nje phezulu.
USkhosana ephawula ngaleli qembu, uthe: “Yilona butho leli esizogadla ngalo elibophele izinkunzi esezimidwayidwa.
"Sikholwa wukuthi njengoba sihambise iqembu elinesipiliyoni nje, lizobuyisa isithunzi saleli lizwe.
"Lo mqhudelwano weNdebe yoMhlaba uzosinika ithuba lokuthi sizibone ukuthi simiphi uma siqhathaniswa namazwe amakhulu emhlabeni kwezokusubatha. Ngifisela lonke ithimba lethu elihambayo ukuba lenze kahle.”
Selilonke iqembu eliya emqhudelwaneni weNdebe yoMhlaba oseLondon ngenyanga ezayo limi kanje: Akani Simbine, Carina Horn, Clarence Munyai, Justine Palframan, Derick Mokaleng, Justine Palframan, Reinhart van Rensburg, Caster Semenya, Jerry Motsau, Antonio Alkana, Rikenette Steenkamp, Lindsey Hanekom, Wenda Nel, Chris Moleya, Julia du Plessis, Neil Giliomee, Christy Nell, Luvo Mayonga, Lynique Beneke, Kgotso Mokoena, Patience Ntshingila, Orazio Cremona, Ischke Senekal, Victor Hogan, Ischke Senekal, Tshepang Makhethe, Margo Chene Pretorius, Philmar Janse van Rensburg, Sunette Viljoen, Rosco Engel, Simon Magakwe, Henricko Bruintjies, Tebogo Mamatu, Lente Pieterse, Cassidy Williamson, Tamsin Thomas, Derick Mokaleng (USA), Thapelo Phora, Pieter Conradie, Zakhitine Nene, Wenda Nel, Ariane Nel noRorisang Ramonye.