"USEYINI UMSEBENZI WAMAKHOSI UMA UNGASEKHO UMHLABA AWENGAMELE"
INKOSI Mangosuthu Buthelezi enguMengameli we-IFP, ithi kuyilumbo ukuthi uMnu FW De Klerk, owaba ngumengameli wokugcina wengcindezelo eNingizimu Afrika, wagunyaza Ingonyama Trust Act ngoba emtotosa ukuze avume i-IFP ingenele ukhetho lwangoMbasa (April) 1994.
Ibikusho lokhu ngesikhathi yethula inkulumo emhlanganweni weNdlu Yabaholi Bendabuko izolo eThekwini. Ithe kuyamangalisa uma nentsha ebingakazalwa zenzeka lezi zinto, izwakala ikhuluma kanjalo.
Uthe iqiniso wukuthi i-IFP yayivele isinqumile ukulungenela ukhetho ngemuva kwezingxoxo zokubonisana ezaziholwa nguSolwazi Washington Okumu, mhla ka-19 kuMbasa (April) 1994 ngaphambi kokuba kushaywe lo mthetho.
Uzwakalise ukudumala ngenkulumo kaMnu Kgalema Motlanthe - obehola ithimba ebelicubungula udaba lomhlaba ngaphansi kwe-ANC - ophakamise ukuba umhlaba ongaphansi kwamakhosi uthathwe unikezwe uhulumeni.
Uqhubeke wathi akukho namunye kwi-ANC oseke waziqhelelanisa nalokhu, okuyinkomba yokuthi lona wumbono wayo osekunesikhathi eside ukhona ukuba kucinywe Ingonyama Trust Act. Lokhu uthe kufakazelwa yisinqumo esenziwe engqungqutheleni yaleli qembu ebingoZibandlela (December) 2017, lapho kuvele khona ukuthi i-ANC KwaZuluNatal bekuyisiphakamiso sayo ukuba umhlaba ongaphansi kwamakhosi uthathwe ngaphandle kwesinxephezelo, unikezwe uhulumeni.
Uxwayise amakhosi ngokuthi nxa lokhu sekwenziwe - ukususwa kwamandla amakhosi okuphatha lawo manenjana omhlaba asasele - kuyobe sekulandelwa wumbuzo othi useyini umsebenzi wamakhosi uma ungasekho umhlaba awengamele ngokohlelo lwendabuko.