Kumenele undlunkulu obesezikhindini ngokukhwabanisa
Ugwetshwe evele egula
INGCINDEZI yokulahlwa yicala kwendlunkulu yesizwe sakwaZondi, KwaMpumuza, yikho iNkosi Nsikayezwe Zondi, ekholwa wukuthi kwenze umkayo wehluleka ukubhekana nomdlavuza obumphethe.
UNdlunkulu Thatheni Zondi, uMaNtombela (61) obengusomabhizinisi, ulahlwe yicala lokukhwabanisa imali engango-R11 million ngoba ubengazigcini izimfanelo zebhizinisi lakhe, iThatheni Women’s Construction kwaSouth African Revenue Services (SARS).
Icala lithe uma limlahla, wavele waquleka phambi kwemantshi waphuthunyiswa esibhedlela kwaba wukuqala kokugula kwakhe okugcine ngokuba kumenele ngoMsombuluko esibhedlela sikahulumeni, iGrey's Hospital.
INkosi Zondi ithi ingcindezi ngamacala yikho okumcindezele kakhulu umkayo njengoba ubesafuna ukuphuma esibhedlela ageze igama lakhe.
“Kakudlali ukufakwa ozankosi ugula uthathwe njengesiboshwa ekubeni wazi kahle ukuthi umsulwa. Ngigcina ukuyombona esibhedlela ngoMgqibelo ngaphambi kokuba adluliselwe eGrey's Hospital esuka eNetcare, ngiphoqeleke ukushesha ngimshiye ngoba bekungizwisa ubuhlungu ukumbona egquma ngaleya ndlela ngenxa yezinhlungu.
“Simyise esibhedlela sikahulumeni ngoba sazi ukuthi sona sinongoti nemishini ekwazi ukwelapha umdla- vuza kanti usezohlala kancane ahambe. Ngibuhlungu ngokuwa kwensika yekhaya. Noma lo mdlavuza wakhe kade wamqala njengoba nalapha ekhaya ubeke angalali ngenxa yezi-nhlungu, besithi uzoba ngcono uma esekodokotela,” kuphetha iNkosi uZondi
Elinye ilungu lomndeni - elicele ukuba igama lalo ligodlwe - litshele ILANGA ukuthi undlunkulu ushona nje, isimo sakhe besesingesihle emalini njengoba nebheyili kuze kwadingeka ukuba ihlanganiswe wumndeni
“Ibhizinisi lakhe beselifana nento efile njengoba bekungaselula ukuba athole imisebenzi kahulumeni kwazise uma ufuna imisebenzi kufanele ufake nezincwadi zakwaSars, yena abengasakwazi ukuzithola.
“Uze ayiswe esibhedlela sikahulumeni nje yingoba i- medical aid ibisiphelelwe yimali yokumgcina esibhedlela esizimele,” kusho leli lungu.
UMaNtombela kulindeleke ukuba afihlwe ngoMgqibelo. UMnu Elliot Nzama ongummeli weNzama and Associates, uthi njengoba undlunkulu ebesesitholile isigwebo sakhe seminyaka ewu-5 ebhadla ejele, sekuphelile ngecala kwazise useshonile.
“Icala belingaqhubeka ukube uSars ubuthe inkampani mayiwukhokhele imali eyikweletayo. Inkampani ibisazolithwala lelo cala noma ngabe umnikazi wayo akasekho emhlabeni. Ukuba bekuthiwa undlunkulu uyayidayisa inkampani, lowo oyithengayo icala belingathwala nguyena inqobo nje uma isasebenza,” kusho uMnu Nzama.