U-TRUMP UPHINDE WALIDUNGUZELISA IRANDI LAKULELI
INTUTHU yomlilo wezohwebo osha ubuhanguhangu phakathi kwe-United States of America (USA) neChina, uxhophe irandi izolo ngoLwesithathu lehla ngo-1% emuva kokuvela kwezindaba zokuthi uMengameli wase-USA, uMnu Donald Trump angase ayiqhube impi yezomnotho neChina futhi axwayise izinkampani zezwe lakhe ukuba zingayisi imikhiqizo yazo kwamanye amazwe.
Ngo-11h01 izolo, irandi belintekenteke liwu-R13.68 kanti ngo15h46 beseligijima ku-13.71 uma liqhathaniswa nedola lase-USA.
“Irandi lintekenteke kakhulu ezimakethe zeminotho esathuthuka namhlanje ekuseni (izolo ekuseni), lilandelwa yiLira yaseTurkey,” kusho uMnu Wichard Cilliers weTreasuryONE.
Uthe idola lase-USA novalo kwezohwebo emhlabeni yikhona okudala yonke le nkinga - yokudunguzela kwerandi.
Uqagule ukuthi abahwebi bazothanda ukudonsa izinyawo, bahwebe ngokucophelela kwazise izimakethe zibheke ukuthi uMnu Trump wenzani ngezimemezelo zakhe nezinsongo kwezomnotho.
NgoLwesibili inkampani yaseUSA ekhiqiza izithuthu, iHarley Davidson ibisikaza ukunyula imikhiqizo yayo kuleliya lizwe ngenxa yezinsongo zikaMnu Trump ofuna ukufaka intela emikhiqizweni eyahluke yamazwe angaphandle kwezwe lakhe nasezinkampanini zakhona e-USA.
Emuva kokuzwa lokho, uMnu Trump usabise iHarley Davidson ngokuthi uma nje ike yakhiqiza izithuthuthu zayo ngaphandle kwe-USA, uyoyishaya ngentela engakazwe ibonwe emlandweni.
Usomnotho waseRand Merchant Bank (RMB), uMnu Isaac Mhlanga, uthe ukuzamazama okuqutshulwa yimpi yezohwebo kudala omkhulu umonakalo ozozwela kakhulu ezi- makethe.
“Njengoba sike sasho phambilini, uma le mpi yezohwebo inganqandwa, akekho ozozuza ngayo,” kusho uMnu Mhlanga.
Kuzokhumbuleka ukuthi nangomhla ka-19 irandi liphazamisekile emuva kokuba uMnu Trump ememezele mhla ka-18 kwephezulu ukuthi izwe lakhe lingase ligadle ngenye intela empahleni yaseChina.
Uthe ufuna ukubheka impahla yaseChina eyenza u-US$200 billion (R2.7 trillion) bese eyishaya ngentela ka-10% uma ingena e-USA. Wesabise ngokuthi uma iChina iziphindisela ngalokhu - ngokushaya izwe lakhe ngentela efanayo - uzophinde abheke enye impahla yaseChina eyenza imali efanayo, ayigixabeze ngentela ka-R10%.
Ubengaqali njengoba ngoNhlaba (May) ememezele ukuthi umnyango wezomnotho ezweni lakhe ubheka imikhiqizo yezimoto evela kwamanye amazwe - ufuna ukufaka intela ka-25% kuyona.
UMnu Trump ubengaqali lapho njengoba engayinika ushwele imboni yensimbi neye- aluminium yaseNingizimu Afrika, yiChina, yiIndia ukubala amazwe ambalwa.