Masethembe ziza nokungcono izikhulu ezintsha zeSABC
INKAMPANI yezokusakaza, engaphansi kukahulumeni, iSouth African Broadcasting Corporation (SABC), imemezele ukubekwa kwezikhulu eziphezulu ezimbili ekuqaleni kwesonto, okuyisinyathelo esihle okwethenjwa ukuthi sizodala uzinzo ekuphathweni kwayo.
Izikhundla ezigcwalisiwe emuva kwesikhathi eside kubambe ezinye izisebenzi zale nhlangano okwesikhashana, yileso somphathi-jikelele weSABC, i- group chief executive officer nesesikhulu esisingethe ezemali, i- chief fina-ncial officer. Ukuqokwa kwalezi zikhulu nokubekwa kwebhodi yabaqondisi entsha nyakenye, kwethenjwa ukuthi kuzosiza ukulungisa isimo sokulawula esingesihle kule nkampani ebaluleke kakhulu ngokusakazela izigidi zabantu.
Kuzokhumbuleka ukuthi iSABC kade ikhungethwe yizinkinga ezinzima kule minyaka ewu-10 eyedlule, okuyenze yalahlekelwa ngabalaleli, ababukeli nezikhangiso okuyizona ezingenisa imali ukuze le nkampani ikwazi ukuqhubeka nomsebenzi iholele nezisebenzi. Lesi simo esibi semali sidale ukuba iSABC ize iyokhangeza kuhulumeni, icele imali yabakhokhi bentela ukutakulwa ezikweletini eziyigabhile.
I-SABC ibaluleke kunazo zonke izinkampani zokusakaza nezezindaba eNingizimu Afrika, kuhlanganisa namaphephandaba imbala, ngoba yengamele inqwaba yeziteshi zemisakazo neziteshi zikamabonakude, kuhlanganisa lapha isikhondlakhondla somsakazo, uKhozi FM, olulalelwa yizigidi eziyisikhombisa. Ngenxa yokuba iningi lezakhamizi lisebenzisa le nhlangano, lokhu kuyenza ibe mqoka empilweni yabantu. Ingozi ngalesi simo wukuthi kuyenza ihlale isengcupheni yokusetshenziswa yiqembu elibusayo - okuyilona eliqoka ibhodi yabaqondisi - ukufeza izinhloso zalo zepolitiki.
Lokhu kwenzeka ngesikhathi sokuphatha sikaMnu Thabo Mbeki, engumengameli, lapho lowo owabe engamele umnyango wezindaba, uDkt Snuki Zikalala, wayeqinisekisa ukuthi umengameli ne-ANC uqobo, bahlale bevezwa kahle ezindabeni ezazisakazwa yiziteshi zeSABC.
Labo ababebonwa njengezitha zikaMnu Mbeki eqenjini, ngengoMnu Jacob Zuma nje, babenyundelwa. Lesi simo sokuchema isidana saqhubeka noma sekuphethe yena uMnu Zuma, lapho isikhulu seSABC, uMnu Hlaudi Motsoeneng, sasiqinisekisa ukuthi izindaba eziveza amahlazo kamengameli kaziqhakanjiswa.
Nangesikhathi sobandlululo kwabe kuyisona leso, uhulumeni wabamhlophe wawusebenzisa le nkampani ukujivaza abaholi bezinhlangano ezazilwela inkululeko. Lona wumlando nje omfushane, kodwa okhombisa ngokusobala ukuthi iSABC inomlando omubi wokuba yithuluzi losopolitiki ukufundisa imfundisoze nokungcolisa amagama ezimbangi zabaphethe izintambo zombuso.
Naphezu kwalo mlando ongemuhle, sethemba ukuthi abaphathi abasha bazowenza ngobuqotho umsebenzi abanikwe wona ukusingatha iSABC, ikakhulukazi esikhathini esibucayi lapho izwe libheke okhethweni lukazwelonke oluzokuba ngonyaka ozayo.
Sethemba ukuthi ngeke baphoxe ngokuqhubeka lapho kugcine khona abadala, kodwa bazosebenza ngokwethembeka.