Iyaqina indaba yomshwalense wezempilo
SELUSEZITHEBENI udaba lomshwalense wezempilo kawonkewonke emuva kokukhishwa kwemithethosivivinywa emibili wuhulumeni ukuze lolu hlelo luqale uma seludingidiwe.
Nemvunge ngokuba yikhongco elibuthaka kwalolu hlelo olubizwa ngeNational Health Insurance (NHI) isiqalile njengoba imiphumela yokusebenza kwalo mshwalense izothikameza usizo lwezokwelapha olutholwa yilabo abangamalungu e- medical aid scheme.
Lo msindo sewuze waholela ekubeni uNgqongqoshe wezeMpilo, uDkt Aaron Motsoaledi, akhiphe emaphephandabeni umbhalo okhokhelwe oyincazelo ngalo mshwalense oyindabegudwini.
Kulo mbhalo umnyango wezempilo uchaza lo mshwalense nokuthi inhloso yawo iyini.
Uqhubeka aphendule imibuzo esezingqondweni zabaningi abangenalo ithemba ngempumelelo yawo futhi abakhathazekile ngokuthi uzophetha ngokubhidliza okukhona nakuba inhloso kuwukuba bonke abantu baseNingizimu Afrika bathole usizo lokwelashwa mahhala.
UYINI UMSHWALENSE WEZEMPILO WESIZWE?
Ngokwecazelo ekhishwe wumnyango wezempilo, uwuhlelo lokuqoqa imali ezobhekela izindleko zokwelapha kuzo zonke izakhamizi zaleli.
Kuthiwa uzosebenza njengamamedical aid akhona manje kepha umahluko wukuthi lo mshwalense uyokhokhela ogulayo zonke izindleko - osebenzayo nongasebenzi, ohola kancane nohola kakhulu.
Umehluko wesibili wukuthi phansi kohlelo lwalo mshwalense ngeke kubhekwe ukuthi umuntu uphila kuliphi izinga lezomnotho kodwa okuzobhekwa wukuthi ukusiphi isimo sezempilo. Nxa konke kuhamba kahle, uhlelo luzoqala ukusebenza ngo 2026.
IZINGQINAMBA
Nakanjani imvunge yokukhononda ezwakalayo ngalo mshwalense ivela kulabo abakhokha kanzima ukuze bathole usizo lokwelashwa abalufunayo ngemali yabo.
Bakhathazekile ngokuthi lokhu okuhlongozwayo kuzothikameza uhlelo oluzimele lokwelapha, okuyilona kuphela manje abaphephela kulona ngenxa yokuwohloka kohlelo lokwelapha olusezandleni zikahulumeni.
Ngokombiko ophume kwelinye lamaphephandaba angeSonto, iCity Press, uMnu Nicholas Burger ongumhlaziyi emkhakheni wezempilo phansi kwenkampani, iFrost & Sullivan, ubona ukuthi zine izinto ezizocacisa ngempumelelo noma ukwahluleka kweNHI. Lezo zinto yimali, wukusebenzisana kwazo zombili izigaba zokwelapha - esizimele nesikahulumeni - yizisebenzi zalo mkhakha eziqeqeshiwe nezokuphatha futhi ezingenayo inkohlakalo.
IMIBUZO EVAMISE UKUBUZWA NGALOLU HLELO
Phakathi kwemibuzo uDkt Motsoaledi avamise ukuhlangabezana nayo ngalolu hlelo kukhona othi luzobasiza kanjani abantu abavele bengamalungu ezikhwama zokwelapha ezikhona njengamanje.
Impendulo ithi kunezikhalo ngowenyuka kwezindleko zobulungu kepha usizo luyancipha. Amanye amalungu kuphela isabelo sawo phakathi nonyaka asale engavikelekile enye ingxenye yonyaka. Kunjalo nje abanye bayadilizwa emsebenzini besebangabe besakwazi ukukhokhela ubulungu.
Kulapho-ke iNHI kuthiwa izosiza khona. Omunye umbuzo uthi uma bonke abantu sebezokwazi ukuthola usizo lokwelashwa ezibhedlela zikahulumeni nakwezizimele, lokho ngeke yini kudale ufuduko, abantu besuka ezibhe- dlela zikahulumeni baye kwezekhethelo ngaphandle kokukhipha imali? Ngokwencazelo yomnyango, kuzolungiswa izinkinga zokuphatha futhi kwenziwe ngcono iqophelo lokusiza umphakathi.
Umbuzo ovuka lapho ngothi, kudingeke ngani ukuba ukuthuthukisa izinga losizo olutholakala ezibhedlela zikahulumeni kulinde kuze kube nale NHI ehlongozwayo?
UDkt Motsoaledi akaphumi nazwi maqondana nokuthi inga- kanani imali efunekayo ukuze lolu hlelo lube yimpumelelo.
UKWESEKWA
Nakuba ama- medical aid kubikwa ukuthi ayaweseka lo mbono kahulumeni, ikakhulukazi nxa lokhu kuzobe kwenzeka kanyekanye nokuqhubeka kwawo, kusenzima ukuqagula ukuthi izoba yini imiphumela yalolu hlelo okubikwa ukuthi luzongeniswa ngezigaba ( phases) kusukela ngo-2022.