Uphephile umsebenzi womqeqeshi weGermany
Unikwe inkontileka ezophela ngo-2022
UPHEPHILE umsebenzi kaJoachim Low ololonga iGermany ehlulwe yiKorea Republic ngo-2-0 izolo ngoLwesithathu ntambama kowokugcina kaGroup F kwiNdebe yoMhlaba eqhubeka eRussia.
UReinhard Grindel ohola iGerman Football Association (GFA), udalule ukuthi akayi ndawo lo mqeqeshi.
Uthi ngisho iGermany ingaphuma kalula kulo mqhudelwano, akayi ndawo lo mqeqeshi.
IGermany iyivule kabi iNdebe yoMhlaba ihlulwa yiMexico ngo-10, kanti kowesibili ibuye sekuvalwe amehlo inqoba iSweden ngo-21 ngeledlule.
“Sibe nomhlangano wobuholi beGFA ngaphambi kweNdebe yoMhlaba.
"Sivumelene sonke ukuthi uLow kumele anikwe inkontileka ezophela ngo-2022. Lokhu ngeke kushintshe ngisho singaphuma kusiphi isigaba kulo mqhudelwano. Sinohlelo lokwakha kabusha isikwati sethu.
“ULow nguyena kuphela ozokwazi ukusiyisa lapho esifuna ukuya khona. Unqobe iFifa Confederation Cup ngabafana abancane ngonyaka odlule. Labo badlali sifuna ukunqoba ngabo iNdebe yoMhlaba eQatar ngo-2022. Abakhohlwe labo abazitshela ukuthi sizohlukana nomqeqeshi wethu,” kusho lesi sikhulu.
Lo mqeqeshi sekunesikhathi eside elolonga iGermany ayinqobele iNdebe yoMhlaba ngo-2014 eBrazil.
Lo mqeqeshi uphumele obala ngemuva kweNdebe yoMhlaba ebikuleli ngo-2010 ukuthi uyokwakha inqanawe yesikwati azonqoba ngaso iNdebe yoMhlaba ka-2014, nebala kwaba njalo.
Bekubhekwe lukhulu kuyona emqhudelwaneni wanonyaka, kodwa idonse kanzima njengoba iqale ngenothi elibi ihlulwa yiMexico ngo-1-0. Izamile ukubuyisa isithunzi inqoba sekuvalwe amehlo iSweden kuba ngu-2-1 nokho kwabheda idliwa yiKorea.