I-PORTUGAL KAYINENDABA NEBHOLA ELIHEHAYO
KAYINANDABA nokudlala ibhola elimnandi iPortugal ezodudulana ne-Uruguay emdlalweni we- last 16 kwiNdebe yoMhlaba ngoMgqibelo eRussia.
UCedric Soares odlala emuva kwiPortugal, uthe beze kulo mqhudelwano nenhloso yokunqoba, hhayi ukuzokhombisa ibhola elisezingeni eliphezulu.
Lo mdlali uthi bayakwazi okumele bakulindele kwi-Uruguay njengoba beqhathwe nayo. Bese kubukeka sengathi iPortugal izobhekana neRussia, kodwa imiphumela yemidlalo yangoMsombuluko kaGroup B yaphendula amatafula.
“Inhloso yethu ukubhekana nomdlalo ngamunye. Size lapha sifuna ukudlulela kwi- last 16.
" Sesingenile kulesi sigaba. Thina asinandaba nokudlala ibhola elihehayo, okumqoka ukuthola imiphumela. I-Uruguay ibophele abadlali abahle kakhulu. Okuhle wukuthi siyabazi abadlali bayo abaningi.
“Siyakuqonda ukuthi yiyona yodwa engakangenelwa yigoli kulo mqhudelwano. Sekuyoshiyana ukwenza enkundleni. Ngicabanga ukuthi sekuyisikhathi sokuba sikhombise ukuthi siyizingqwele zaseEurope,” kusho lo mdlali.
Ebuzwa lo mdlali ngephenathi ayidalile bebhekene ne-Iran, uthe: “Angithandi ukukhuluma ngezinto engingenamandla okuzishintsha. Kumele sizihloniphe izinqumo zeFifa. Nokho-ke ngizokulwela ukuthi kungangiphazamisi ensimini ukudala iphenathi.”
Kulindeleke ukuba i-Uruguay iqhubeke nokuthembela kuLuis Suarez no-Edinson Cavani. IPortugal ibuyela enkundleni ebambane kuyona ngo-3-3 neSpain kowokuvula.
UCedric udale iphenathi bebhekene neIran ngoMsombuluko okuyiyona eholele ekutheni umdlalo uphele zibambene ngo1-1.
ISpain ivalele igoli seliyoshona ibambana neMorocco ngo-2-2, okwenze yaqeda iqhwakele kwiGroup B, kwathi iPortugal yaqeda endaweni yesibili kuleli qoqo.
UCristiano “CR7” Ronaldo kulindeleke ukuba aqhubeke nokutakula iPortugal njengoba evalela amagoli amqoka.