ISharks neyaseFrance eMoses Mabhida
Kuzoqopheka umlando ngoNcwaba
KUZOQOPHEKA umlando iCell C Sharks idlala umdlalo wayo wokuqala ngqa eMoses Mabhida Stadium, eThekwini, lapho izokube ibhekene khona neBordeaux Begles yaseFrance ngoLwesihlanu lomhla ka-17 kuNcwaba (August) kule nkundla eyakhelwe imidlalo kanobhutshuzwayo yeNdebe yoMhlaba ebikuleli ngo2010.
Lo mdlalo obizwa ngeDurban Challenge wethulwe izolo ngoLwesithathu emini eMoses Mabhida, kanti umcimbi bewuhanjelwe yiMeya yeTheku uZandile Gumede, yisikhulu esiphezulu seSharks u-Eduard Coetzee, uSbu Zondi weDurban Tourism noVusi Mazibuko oyimenenja eMoses Mabhida. Kulindeleke izinga eliphezulu kulo mdlalo kwazise iFrance ingelinye lamazwe enza kahle ebholeni lombhoxo.
Ikhuluma emcimbini wokwethulwa kwalo mqhudelwano iMeya yeTheku, ithe kubajabulise kakhulu bewumasipala ukuba yingxenye yalo mqhudelwano.
Yize iSharks izokube idlala umdlalo wayo wokuqala eMoses Mabhida kodwa kuzokhumbuleka ukuthi uke waba khona umdlalo wombhoxo phakathi kweSouth Africa “A” eyayidlala neFrench Barbarians yaseFrance nyakenye.
“SiyiTheku sinobudlelwano obuhle neSharks. Kusithokozisa kakhulu ukuba yingxenye yale ngqophamlando lapho iSharks izokube idlala okokuqala eMoses Mabhida.
IMabhida yindawo enhle futhi eyamukela abantu abaningi. Lo mdlalo uzobhala umlando omuhle ngedolobha lethu. Le nkundla isanda kusingatha ngempumelelo iComrades Marathon okusijabulise kakhulu,” kusho iMeya uGumede.
Umdlalo weSharks neBordeaux uzovulelwa ngoweSharks U/19 namakilabhu amabili asemalokishini. Isikhulu seSharks sithe basazohlangana ukubhunga ukuthi amathikithi alo mqhudelwano azobiza malini.