OweBucs nesexwayiso kubadlali
Kumele bahluze imiqondo ngaphambi kokusayina
ISILOMO se-Orlando Pirates sixwayisa abadlali ngokuhluzisisa kahle imiqondo ngaphambi kokujabulela ukushelwa ngamakilabhu amakhulu aseNingizimu Afrika.
UXola “1010” Mlambo waseDobsonville, eSoweto, ogijima esiswini kwiBucs, uthi injabulo yokujoyina ikilabhu enkulu iphenduka usizi kwesinye isikhathi.
Ukhulume ngalolu hlobo ngesikhathi ILANGA limbuza ngezinselelo ezingase zibhekane noBen Motshwari noVincent Pule abedlala nabo kwiBidvest Wits, abasanda kujoyina iBucs.
UMlambo uthi ucabanga ukuthi laba badlali bayihluze kahle imiqondo yabo ngaphambi kokujoyina le kilabhu. UMlambo ujoyine iBucs maphakathi nesizini edlule esuka kwiWits, kodwa wafike wayenza eyakhe indawo yasesiswini adlala kuyona ngokubambisana noMusa Nyatama.
“Iyashisa insimbi lapha kwiPirates. Umbango wejezi ushube kakhulu. Kumele ucabangisise ngaphambi kokusayina. Uthola ukuthi umdlali usuka ekilabhini encane edlala njalo, kodwa angalitholi ithuba kwiPirates. Lokhuke kuba nomthelela ongemuhle ngoba ugcina usuhlala ebhentshini kwesinye isikhathi uhlale ezihlweleni.
“Ungazithola sewubolekiswa, uthi uyabuya kutholakale ukuthi indawo kunzima ukuyiphendla esikimini.
"IPirates inabadlali abavuthiwe kuzona zonke izindawo. Kumqoka ukusebenza kanzima ngezinsuku zokuqala ukuze uhehe iso lomqeqeshi. Nami ngizitshele ukuthi kumele ngizikhandle ngokuphindiwe njengoba ngijoyine le kilabhu phakathi nesizini.
“Lokhu-ke bekungaqali ukungehlela ngoba nakwiWits ngifike ibuya kokwenza amalungiselelo okuqala kwesizini ngiphuma kwiChippa United.
"UBen noPule ngiyabethemba ukuthi bazosebenza kanzima. Ngiyawazi amagalelo abo ngoba besidlala nabo,” kusho uMlambo obekade evakashele uPhakamani Mahlambi eLouwsburg enhla neKwaZulu-Natal.
UMlambo noMahlambi bebeyibambe kwiWits ngaphambi kokuthatha izindlela ezahlukene. IBucs ivule ngesonto eledlule ukuqala amalungiselelo esizini entsha ebukeka izokuba matasa kuyona njengoba izodlala nakwiCaf Champions League ngasekupheleni kwalo nyaka.