Kufezeke iphupho ngoMajestic Mambo kwi-VDJ
KUBE ngukufezeka kwephupho kumqeqeshi waseHighfield, uPaul Peter, ukungena kwehhashi lake ohlwini lwamahhashi okugcina azobamba iqhaza emjahweni omkhulukazi e-Afrika, iVodacom Durban July ezokuba ngoMgqibelo womhla ka 7 Julayi 2018 eGreyville Racecourse, eThekwini. UPeter nojokhi wake uCallan Murrat banethemba elikhulu lokuthi ihhashi labo, uMajestic Mambo lizokuba nethuba lokunqoba lo mjaho.
Leli jongosi elivutha bhe elizalwa nguMambo In Seattle belingqabashiya eTurffontein ekuqaleni kwaleli sonto kanti uMurray “uchazekile” ngomsebenzi asebewenzile.
UPeter uthe uMajestic Mambo ugijime kale kakhulu emjahweni kaGrade 1, iDaily News 2000 lapho ephume khona endaweni yesibili kanti ulokhu eba ngcono kakhulu kusukela lapho.
Ukhombisile futhi ukuthi uwuhlobo olungayiqali kahle imijaho nokho waqinisa kakhulu ngasekugcineni, esala ngam- agxathu amathathu kuSurcharge okungelinye lamahhashi ahamba phambili eHighfiled.
Lo mjaho uveze ikhono lamahhashi aneminyaka emithathu agijima eHighfield njengoba amane awo eshiye emuva amanye amane evela eKapa, okungoTap O’ Noth, Do It Again, White River noPack Leader.
Kube nokuvungama ezihlweleni ngoLwesibili eGreyville Classic Room ngesikhathi uMajestic Mambo ethola umzila ka-19 koweVDJ.
Nokho uPeter uthe, “Ukubekwa kulo mzila akukubi kakhulu ehhashini lalolu hlobo, akathandi ukumpintshwa, ngakho-ke angikhathazekile kakhulu.”
Wengeze ngokuthi, “Sinethemba elikhulu.
Sijabule kakhulu ngaye, sicela kuMdali ukuba asisize nje ukuba konke kuhambe kahle, afike kahle nasemjahweni. Silindele lukhulu kuyena.”
Kunethuba lokuthi uMajestic Mambo angase agqoke imibala engundabizekwayo ye-VDJ njengoba sishicilele kusadingidwa indaba yesivumelwano sokuthengiselana nomnikazi wamahhashi ohamba phambili eNingizmu Afrika.
Peter unelinye ihhashi elizogijima emjahweni kaGrade1 ngalolu suku, okunguFolk Dance, insikazi eneminyaka engu-3 ezalwa nguTiger Ridge ezobe igabavula kwiJonsson Workwear Garden Province Stakes ebangeni lika1 600m.
Washaya izinga eliphansi egcina ukugijima kwiGrade 2 Tibouchina ebangeni kuka-1 400mnokho uPeter uthi ngalelo langa wayevele engazange abe nosuku oluhle ngesikhathi bethuthwa kanti wazishayisa enqoleni.
Wanqoba iGrade 3 Fillies Mile ngamagxathu amathathu ngosuku lwe-Sansui Summer Cup ezibekisela indigo njengelinye lamahhashi ahamba phambili esigabeni sakhe, kodwa-ke kusukela lapho ubhekane nenselelo yokubekwa emizileni emibi lapho elale khona isine kwi-Grade 2 Wilgerbosdrift Gauteng Fillies Guineas, isihlanu kwi-Grade 1 SA Fillies Classic ka-1800m nesten kwi-Grade 1 Empress Club Stakes ka-1600m.
Kulokhu uthole umzila omuhle kakhulu njengoba ebekwe kowesibili, okuyinto enhle kuyena njengoba ekuthanda ukulala, atiphe bese egabavula ngamadla ngasesigabeni sokugcina somjaho.
Ihhashi eliyimfivilithi, uSnowdance, libekwe emzileni ongasekugcineni okuyinto ezolilimaza njengoba lithanda ukuzihola phambili zisasuka, kanti lokhu kungamsebenzela uFolk Dance. Ngelinye lamahhashi asefake ibhonasi emahhashini azokube egitshelwe nguPierre Strydom ngalolu suku.