Ushaye isidudla, wazidubula wafa
Ubexabene nozakwabo
KUSUKE isidumo izolo ngeSonto ekuseni kwa-V, eMlazi emarobhothini odumo ngesikhathi owesilisa ehamba edubula, evimba izimoto, maqede wazisakaza ngenhlamvu ekhanda waphelela khona lapho.
Kusolwa ukuthi kube nengxabano phakathi kwalona wesilisa onguSdu Sitole - odabuka eMozambique - nozakwabo abesebenza naye, okuyiyona okuthiwa iholele ekubeni agcine egile lo mhlola oshiye abantu abebekule ndawo bethukile.
Izimoto bezihlehla amarobhothi evuliwe, abashayeli bebalekela ukuthi hleze badliwe yinhlamvu bengazelele.
Ngokusho kukaNkz Siyo Msomi ozibonele lesi sigameko, uMnu Sitole obehamba ngeCiti Golf, uqhamuke ehamba edubula emoyeni, eshaya isidudla ngemoto, wafika wama erobhothini wehla waqhubeka nokudubula ephethe ibhodlela lotshwala elokhu ebuchela emoyeni.
“Thina besesibaleke sayoma ngakwenye yamakhonteyina sibuka. Amaphoyisa afike selidume ledlula, ngenhlanhla akekho olimele ngaphandle kwezimoto ezishayisane zihlehla,” kusho yena.
UMnu Sitole uzibulala nje, unengane enenyanga izelwe, ayithole kuNkz Mbali Dlamini wakhona eMlazi. Ekhuluma neLANGA uNkz Dlamini, uthe ugcine ukukhuluma noMnu Sitole ekuseni emtshela ukuthi kukhona umuntu asebenza naye angazwani naye futhi ngendlela adinwe ngayo, ucabanga ukuzibulala.
“Bengithi uyadlala ngoba naye ubehleka ngesikhathi engixoxela. Kangizange ngimbuze nokuthi ngubani lowo nokuthi babangani,” kusho uNkz Dlamini. Unina kaNkz Dlamini, uNkk Thandekile Dlamini, uthi isenzo sikaMnu Sitole simphazamise wangabe esaya ngisho emsebenzini.
“Besengisetekisini, okuthe uma idlula kwa-V ngabona izimoto zamaphoyisa nemoto kaSdu imile, kukhona umuntu olele phansi. Bengizitshela ukuthi mhlawumbe uvelelwe yingozi. Kuthe uma ngehla etekisini ngisondela, ngabona ukuthi nguyena.
“Ngihlulekile wukuzibamba iphoyisa laze leza kimi lizobuza ukuthi ngiyamazi yini lo olele la. Ngilitshelile ukuthi ngiyamazi, uzele ingane kwami. Libe selibuza ukuthi ngihamba nobani noma ukhona yini ongakwazi ukungilanda. Ngithathwe yindodana yami ngoba besengiphelelwe nangamandla wukwethuka,” kusho yena.
Uchaze uMnu Sitole njengomuntu olungile futhi obewuhlonipha nomuzi wakhe.
“Okungizwisa ubuhlungu kakhulu, yile ngane ayizele ezokhula ingamazi uyise. Ukuzibulala kwakhe kusithwese umthwalo onzima ngoba isizokhuliswa yithi sodwa yena engasekho kanti nonina akasebenzi. Kangazi yini le ebimxakile futhi ingakhulumeki ngoba noma ngabe uxakwe yini uma uyikhuluma, iyadlula,” kusho uNkk Dlamini.
Umfowabo kamufi, uMnu João Sitole, uthe basashaqekile ngesenzo somfowabo abangazi ukuthi ubedinwe yini.
“Akakaze asho ukuthi unezinkinga kithina. Simgcine izolo njengoba engalalanga ekhaya, nakhu-ke sesibizwa sekuthiwa akasekho. Kasazi ukuthi sizothathani sihlanganise nani ukuhambisa isidumbu sakhe ekhaya eMozambique njengoba nguyena obesebenza into engcono kunathi, engumakhi,” kusho uMnu Sitole.
Okhulumela amaphoyisa KwaZulu-Natal, uLt Colonel Thulani Zwane, uthe amaphoyisa avule idokodo lophenyo ngalolu daba.