Kubhikishe abazali befuna u-
Basonga ngokuthi ngeke sivulwe isikole
LUYASHUBA udaba lokungaqasheki kukathishanhloko e-Okumhlophe High School, eMlazi njengoba abazali bezingane ezifunda khona bebeqhinqe esangweni ngoLwesihlanu, bethi lesi sikole ngeke sivulwe mhla ka-17 kwephezulu - uma sekuvulwa izikole - uma engakaqashwa.
ILANGA libike kaningana ngalolu daba lapho isigungu esilawula isikole besikhala ngokuthi kade sayenza inhlolokhono, samphakamisa uthishanhloko oyiphasile, kodwa kuze kube yimanje akaqashiwe ngoba kuthiwa iSouth African Democratic Teachers' Union (Sadtu) kayimfuni.
Omunye wabazali abakhulume neLANGA, uthe selokhu kwahamba uthishanhloko kulesi sikole, izinto zimapeketwana.
“Okubuhlungu wukuthi kade yenziwa inhlolokhono yokuqasha uthishanhloko omusha, kodwa umnyango (wezemfundo KwaZuluNatal) kawufuni ukumqasha.
“Isikole sifaya abafundi kabalawuleki. Abanye abazali sebeya- zikhipha izingane zabo la sebeyozifundisa kwezinye izikole, okuzogcina sekwenza ukuba sivalwe. Umnyango sesiwubhalele izincwadi saze sakhathala sibuza ukuthi kubambephi ngokuqashwa kukathishanhloko,” kusho yena.
UNkk Dudu Luthuli oyilungu lekomidi lika-ward 86 - kuMasipala weTheku - uthi sebekhathele wukuba izingane zabo baziyise ezikoleni zabelungu ukuze zithole imfundo engcono zibe zikhona eziseduze kwabo zibulawa ngamabomu.
Lolu daba selungenwe nanguSihlalo wePortfolio Committee yoMnyango wezeMfundo KwaZuluNatal, uNkz Linda Hlongwa, otshele abazali ukuthi uphatheka kabi njengoba izingane zase-Okumhlophe kungenzeka zingafundi mhla kuvulwa izikole ngenxa yenkinga edalwa wumnyango.
“Ngizobhalela iphalamende ngihlangane nesifunda sezemfundo ngizwe ukuthi kubambephi ngokuqashwa kukathishanhloko.
“Ngizozama ngakho konke okusemandleni ukuze sigweme ukuphazamiseka kokufunda kwezingane. Usuku kungafundwanga, lukhulu kabi njengoba manje sekulungiselwa ukuphela konyaka.
“Izinkinga ezifuze lezi kumele zisukunyelwe kungaze kwenzeke lokhu okwenzeke eMuden, abazali beshisa isikole ngoba nakhu izingane zingadli esikoleni.
“Kuzothi uma sengihlanganile nalezi zinhlaka, ngibuyele kubazali ngibachazele ukuthi umhlangano wethu uhambe kanjani ngoba into ebathukuthelisa kakhulu wukunganakwa,” kusho uNkz Hlongwa.
Okhulumela uMnyango weMfundo KwaZulu-Natal, uMnu Muzi Mahlambi, uthe udaba lwase-Okomhlophe bayazi ngalo futhi baphezu kwalo.
“Inkinga ebeyenza ukubambezeleka kokuqashwa kukathishanhloko wukuthi sithole izikhalo zokuthi kukhona okungenzekanga ngendlela ngesikhathi kwenziwa inhlolokhono. Kumanje simatasa senza uphenyo.
“Sicela abazali basibekezelele, lolu daba sizolulungisa ngokushesha hhayi ngoba bona sebebeke umqamulalajuqu, yingoba siyazi ukuthi kumele lulungiswe.
“Ziningi nezinye izikole okuqokwa kuzona othishanhloko, akusona lesi kuphela. Zonke lezi zikole sicela zibekezele,” kuphetha uMnu Mahlambi.