LIMSHONELE OBEPHUCA UNOGADA ISIBHAMU
ULAHLWE ngelakubo owesilisa waseClermont, eThekwini, okuthiwa udutshulwe ngunogada obeqaphe imoto kaMasipala weTheku ebilungisa ugesi ngoMgqibelo, emuva kokuba eza-me ukumphuca isibhamu.
Abazibonele, bathi abantu abebesemajoyintini aseduze nalapho kwenzeke khona lesi sigameko, bashiye phansi utshwala bathi galo yephuka bezwa ukuqhuma kwesibhamu - okuthiwa sekuyinsakavukela umchilo wesidaba kule ndawo.
Omunye wabantu abazibonele okhulume neLANGA, uthe: “Bengihamba ngemoto ngabona umfana obegqoke isikhindi esimhlophe ehamba nobefake ijakhethi emnyama bezama ukuphuca unogada isibhamu.
“Emuva kwalokho kangibange ngisabona ukuthi kwenzekeni, ngizwe sekuqhuma isibhamu siphindelelela,” kulandisa umthombo.
Omunye uthi uphume ngesamagundane emtapweni wolwazi okule ndawo - njengoba lesi sigameko senzeke emuva kwamasango awo - uthe ushiye izincwadi ezitshela ukuthi isibhamu siqhuma ngaphakathi.
“Ngithe ngiphuma ngabona igazi ligobhoza, besengisaba ngisho ukuphindela emtapweni wolwazi ngendlela ebengithuke ngayo. Kusazothatha isikhathi ukuthi ngiphindele khona,” kusho lo mthombo.
Okukhathaza umphakathi wale ndawo wubugebengu osebuphezulu kakhulu njengoba ukuqhuma kwesibhamu sekuphenduke ingxenye yempilo.
Lesi sigameko senzeka nje, kusanda kutholakala isidumbu sowesifazane osemdala eduzane nendlu yesonto.
Umphakathi ubuye usole izidakamizwa ukuthi yizo eziyimbangela yobugebengu kule ndawo, kwazise zidla lubi.
Okhulumela amaphoyisa KwaZulu-Natal, uLieutenant Colonel Thulani Zwane, uthe kusolakala ukuthi umsolwa oneminyaka ewu-32, ubezama ukuphuca unogada isibhamu e-Clermont. Kuvulwe icala lokubulala ngokungenhloso, amaphoyisa ayaqhubeka nophenyo. Bekungakaboshwa muntu.
Bengihamba ngemoto ngabona umfana obegqoke isikhindi esimhlophe ehamba nobefake ijakhethi emnyama bezama ukuphuca unogada isibhamu. ...ngizwe sekuqhuma isibhamu...