Abalimi "bavimba" intuthuko kamasipala
"Bagweve" nomhlaba okumele kugxunyekwe kuwo ugesi
UKHOMBA abalimi ngenjumbane uMasipala iDr Nkosazana Dlamini Zuma, uthi bagweve nomhlaba wabo ukuze kugxunyekwe izigxobo zikagesi okufanele ufakelwe abantu - lokhu ukuchaza njengokuvimba intuthuko.
UMnu Philani Shange, oyisekela lemeya yaseDr Nkosazana Dlamini Zuma, uthi lokhu kwenza eminye imiphakathi idonse kanzima, ingawutholi ugesi.
Lokhu ukusho ngoLwesihlanu, eHimeville, e-Underberg umasipala wakhe kade uphasisa isabelomali sonyakamali ka-2018-19 esiwu-R245 million.
Kulezi zindawo ubalule i-Underberg, wathi ithanda ukusilela ezinhlelweni zentuthuko ngenxa yokuthi kunabanikazi bomhlaba abangafuni lutho, abaveza ukuthi nabo bayazikhokhela izindleko zikamasipala ngakho-ke kumele bahlonishwe ngomhlaba wabo.
“Sinenkinga enkulu yomhlaba, kasikwazi ukusiza abantu ezindaweni eziningi ngenxa yale nto. Sisemkhankasweni wokuxoxa nabanikazi bomhlaba ukuze sizowuthatha ubuyele ngaphansi kwethu siwumasipala.
“Sizophinde senze ucwaningo olunzulu ngawo umhlaba lona kule ndawo ngoba ziningi izindawo esesithole ukuthi kazinabo abanikazi kanti ezinye zazo kukhona asebazithatha bathi ngezabo ekubeni kungenjalo. Lapho khona kunomhlaba, sizowuthatha ngoba kasikwazi ukuyekela abantu bengathuthuki ngenxa yabantu abathile emapulazini,” kusho uMnu Shange.
Uthi kunesigameko lapho kushe khona owesifazane nengane yakhe ngenxa yekhandlela, okungenye yezinto ezenza balwele ukuba umphakathi uthole ugesi.
Uthe nakuba isabelo sabo sisincane kodwa bezokwenza konke okusemandleni ukuthi izidingo zomphakathi zibekwe phambili. U-R2.3 million kulesi sabelo, uMnu Shange uthe kuzobhekelelwa izinhlelo zokuthuthukiswa kwentsha, imali engaphezu kukaR10 million ngeyokuba kubhekelelwe izingqalasizinda, ukulungiswa kwezakhiwo zomphakathi, ukuthuthukisa ezemidlalo, ezokuvakasha, ezobuciko namasiko.
UMnu Shange uthi baphinde balekelele abafundi abaswele abaphase kahle umatikuletsheni ngemali yokubhalisa emanyuvesi kanti abanye babo babafundisa ngisho eCuba.