Ufisa o-DJ besifazane bangazehlisi isithunzi
UGQUGQUZELA oDJ besifazane ukuba bangazehlisi isithunzi baye ocansini nabesilisa asebephumelele kulo mkhakha wokuklwebha amapuleti ngoba befuna ukuthola udumo.
USindisiwe Zungu (34) - odume ngelikaDJ C’ndo, kwezobumnandi - odabuka eMandeni, ungowesifazane oyibekile induku ebandla kulo mkhakha njengoba esebekhona isikhathi eside.
Ungowesifaze wokuqala ukungena ngaphansi kwesitebela sikaMthokozisi “Dj Tira” Khathi, i-Afrotainment. Ekhuluma neLA
uC’ndo, uthe emkhakheni akuwona kakumele umuntu athathe izindlela ezinqamulelayo ngoba ngeke afike lapho ephikelele khona.
Uthe uma ungumuntu kumele uzihloniphe ukuze nabanye abantu bakuhloniphe. Utshele
ukuthi yena ugabe ngeDiploma kwi-Environmental Health Studies, ayithole eMangosuthu University of Technology (MUT) ngo-2009.
Uthe ubengazitsheli ukuthi uyoke aligqoke ijazi lasenyuvesi ngoba ukuklwebha amapuleti be- kuthatha sonke isikhathi sakhe, esokufunda ubengasitholi.
Ubemane ezichithela isizungu nje, ngokuklwebha amapuleti, ubengazitsheli ukuthi ngelinye ilanga lokhu kuyomfikisa lapho ekhona njengamanje.
“Ngiphazamisekile esikoleni ngenxa yokuklwebha amapuleti, ngaphoqeleka ukuba ngime kancane kwazise umsebenzi wokuba nguDJ ubuthatha sonke isikhathi sami.
“Ngibuyele enyuvesi ngo-2009 sengiyoqeda iDiploma yami ngoba kubalulekile ukuba nesicucu semfundo kwazise uma kungasahambi kahle emkhakheni engikuwona, ngiyazi ukuthi ngizowuthola umsebenzi engiwufundele.
“Ukusebenza kwami ngokuzikhandla yikhona okungibeke lapha engikhona namhlanje,” kusho uC’ndo.
Utshele ILANGA ukuthi kuyamjabulisa ukubona sanda isibalo soDJ besifazane njengoba bekwaziwa ukuthi lona wumkhakha wabantu besilisa kuphela.
Uthi uma engekho matasa uthanda ukuzikhipha ayobuka amafilimu, achithe isikhathi nabangani, ungumuntu othanda izinto ezijwayelekile.
Utshele leli phephandaba ukuthi konke akwenzayo ubeka uJehova phambili ngoba noma ezonandisa uqala ngokuthandaza.
Uthi ngelinye ilanga uyafisa ukuthola izingane ngoba ziyisibusiso esivela kuNkulunkulu.
“Ingane engihlale ngishutha nayo ngiyifake ezinkundleni zokuxhumana, ngekadadewethu, ngelinye ilanga ngiyafisa ukushada kodwa kangijahile ngenxa yomsebenzi engiwenzayo,” kusho yena.