Nabantwana siyabaphatha isifo sesibindi
ISIBINDI sibalwa nezitho zomzimba ezibalulekile nezibucayi nokuthi nxa zihlabekile, lokho kuthikameze ukusebenza kwezinye futhi izitho zomzimba nazo ezibucayi. Namuhla sibheka i-hepatitis, okungesinye sezifo zesibindi ezivamile.
IYINI I-HEPATITIS? Wukuba buthaka kweesibindi okuye kwenze sivuvukale. Kwabanye kakubi nazimpawu ezibonakalayo ngaphandle kumuntu osehlabekile kanti abanye kuguquka umbala omhlophe wamehlo nesikhumba kube phuzi, babenenhliziyo emnyama, bazizwe bekhathele, kube buhlungu isisu, baphalaze noma kokunye babenesihudo, ukukhondama kwezinso naso isibindi kungabe kusasebenza kanjalo nokuncipha emzimbeni.
IMBANGELA YASO
Izinhlobo zesifo sesibindi ziya ngembangela yazo. Ezivamile, ngolubangelwa ngamagciwane, olubangelwa wubuthaka bamasosha omzimba nxa enza iphutha ngokuhlasela umnikazi womzimba nolubangelwa wuphuzo olunamandla.
Kukhona nezinye izinhlobo ezibangelwa yimishanguzo nobuthi. Ziwu-5 izinhlobo zezifo zesibindi ezibangwa ngamagciwane kanti zethiwa ngamabizo awo lawo magciwane ayimbangela yazo.
I- virus: yi- type A, B, C, D, no-E. Izinhlobo u-A no-E zivame ukusabalala ngenxa yokudla namanzi okugcolile noma okuthile okugxambukele kuwona ngezindlela ezithile.
Uhlobo oluwu-B, lutholakala uma kwenziwa ucansi kanti owesifazane ozithwele angalwedlulisela kumntwana amkhulelwe noma ngesikhathi ebeletha.
Izinhlobo o-B no-C zifafazwa wukusebenzisa inalithi ebisetshenziswa ngosehlabekile yilesi sifo, ikakhulukazi labo abazijova ngezidakamizwa.
Uhlobo u-D luphatha lowo osevele ephethwe wuhlobo luka-B. Ukuzimuka nakho kuyabalwa ezintweni ezingaba yimbangela yesifo sesibindi. Ulibofuzo nalo luyaba nomthelela eku
nge- nweni yilesi sifo.
OKUMELE UKWAZI NGOBUNGOZI BEZIFO ZESIBINDI
Iningi lethu selike lezwa ngezinhlobo zobuthaka besibindi kodwa bambalwa abayiqondayo ingozi engaphetha ngokuba wedlule emhlabeni ngenxa yalesi sifo.
Isibindi yisitho somzimba esikhulu kunazo zonke kwezangaphakathi. Senza imisebenzi eminingi esemqoka, phakathi kwayo wukuguqula ukudla kube ngamandla adingwa wumzimba nokukhuculula utshwala nobuthi okusegazini. Senza nalokhu okulandelayo:
Sikhiqiza inyongo eyelekelela ekugayekeni kokudla.
Sikhiqiza ama- protein nezithako ezenza igazi likwazi ukwenza ama
hlule. Silawula izinga likashukela ( glucose) osegazini futhi silondoloza lowo oweqile kodingekayo.
Silekelelana nesisu ekucoliseni ukudla (esiswini).
Sigcina ama-vithamini namamineral.
Sikhuculula ukungcola okunobuthi egazini.
UHLOBO OLUDALWA WUPHUZO OLUNAMANDLA
Utshwala nezidakamizwa nakho kuyasidala isifo sesibindi. Isifo sesibindi lesi sivuvukalisa isibindi, bese singakwazi ukwenza kahle umsebenzi waso. Lokhu kuholela ekubeni kuvele umdlavuza ( cirrhosis) waso. Lolu hlobo lwenza kunqwabelane amafutha kuma- cell esibindi nokushisa ( inflammation) okusilimaza unomphelo isibindi. Lesi simo senzeka kulabo abadla amanzi amponjwana ngokweqile futhi yibona vele abasengcupheni enkulu ukudlula abanye.
Isithako i- ethyl esitholakala kubhiya, ewayinini nakugologo, senza umuntu adakwe, utshwala buthinta zonke izitho zomzimba nokusebenza kwemizwa yobuchopho.
Umphumela wotshwala kumuntu uhambelana ngqo nomthamo asuke ewuphuzile. Ukuyeka utshwala kuyasiza kakhulu kokhokhobelwa yisifo sesibindi.
IZIMPAWU ZESIFO SESIBINDI KUBANTWANA
Nakuba ngokujwayelikile izinkinga zesibindi zivela kwabadala ngenxa yezindlela abaphila ngazo, ngeshwa nabantwana bayaphathwa yizifo zesibindi. Lapha sizobala kafushane izimpawu ezivamile zesibindi esibuthaka kubantwana. Ezinye zazo yilezi:
Umbala ophuzi esikhumbeni nasengxenyeni emhlophe yamehlo (jaundice) ngenxa yesithako senyongo esiningi egazini.
Umshobingo wontwana uyadungeka ngenxa yenyongo ephuma ngokudlula ezinsweni.
Ukuvuvukala kwesibindi kuye kuhambisane nokungakhululeki kwesisu somntwana.
Umfutho ophezulu ngokungajwayelikile emthanjeni othumela igazi esibindini. Lokhu kuye kuholele ekubeni kudaleke imithambo yegazi emisha eyenza igazi lingadluli esibindini bese ukungcola obekuzokhucululwa yisibindi kudlule negazi kuye kwezinye izitho zomzimba.
Imithambo yomminzo kungenzeka ibe sengcupheni yokopha.
Ukusebenza kobuchopho kuyathikamezeka ngenxa yokunqwabelana kokungcola okungakhucululwanga yisibindi.
Isiphetho kuba wukukhondama unomphelo kwesibindi.
IZABA
Zikhona izinhlobo zesifo sesibindi ezivikelwa ngokugoma. Uma singafuni ukuziphelela, kuye kusetshenziswe imishanguzo eqondene naso.
Kuyenzeka ubuthaka besibindi bube ngamahlalakhona - okuwukuthi lowo esimphethe useyoze afe naso. Njengoba sekushiwo, ukuluyeka nya uphuzo olunamandla kusemqoka kakhulu ekukhuliseni amathuba okuba welapheke.
Kawukho umshanguzo wokwelapha isibindi esesidlavuzekile. Kulabo abambalwa abasethubeni lokuthola usizo lokuxhunyelwa isibindi esinikeliwe, yiyona ndlela engcono yokuba asinde lowo obesengene wagamaxa ophuzweni olunamandla. Inkinga-ke wuhlu olude lwabalindele ukusizwa
ngale ndlela.