Inkinga "yokuntshontshwa" kwamanzi ixake umasipala
Sebekhethe ukufundisa umphakathi ngokongiwa kwawo
UVALO oluqutshulwa wukuthi umphakathi ongaphansi kukaMasipala uMkhanyakude, uzokhokhiswa uma ufakelwa amanzi - seluholele ekubeni kubhotshozwe amapayipi ukuze abantu bazixhumele ngokungemthetho. Lesi simo - sesiphoqe lo masipala ukuba uphume uyofundisa umphakathi kabanzi ngokonga nokuphatha amanzi.
Lezi zindaba zivezwe yiMeya yaseMkhanyakude, uMnu Solomon Mkhombo, ngoLwesihlanu, esigcawini sabezindaba kwelinye lamahhotela eliseMkhuze.
“Leyo yiyona inkinga enkulu esinayo, yingakho abantu kumele sibafundise nokuthi ngabanjani abakhokhela amanzi kube ngabanjani abangawakhokheli. Nakhona kubalulekile ukuba uma befuna ukuxhunyelwa amapayipi bakwenze ngokulandela imigudu efanele lokho ngoba ukuvuza kwamanzi kuyisiphazamiso esikhulu, kulimaza lo msebenzi ongaka esewenziwe,” kusho uMnu Mkhombo.
Uthe phambilini abantu baseMkhanyakude bebengaphansi kwenkulu ingcindezelo beswele ngisho amanzi ahlanzekile, kodwa kubaxaka ukuthi kudalwa yini ukweswela kwabo amanzi kwazise banenkunzimalanga yedamu eliseJozini.
“Lokhu bekudalwa wukungabikhona kwezingqalasizinda. Kudingeke ukuba umasipala uqale ngokwakha zona futhi zibe sezingeni eliphezulu ukuze siqini- sekise ukuthi zizophilisa imiphakathi yakithi isikhathi eside,” kusho yena.
UMasipala waseMkhanyakude ubhekelela imiphakathi yomasipala abancane abane abangaphansi kwawo, okuwuMtubatuba, iJozini, yiKwaHlabisa Big 5 noMhlabuyalingana.
Phakathi kwalezi zingqalasizinda zamanzi sekwakhiwe Ingwavuma Water, eseJozini edle u-R900 million, kuthiwa yisona sigcina-manzi ( reservoir) esikhulu kunazo zonke KwaZulu-Natal, sikhiqiza amanzi awu-40 megalitre ngosuku.
“Kuyimanje eMkhuze sinweba iMkhuze Water Treatment Works ebeyikhiqiza u-1.8 megalitre ngosuku, sifuna yenze u-3.8 megalitre,” kusho yena.
Uthi libuyile ithemba kulo masipala njengoba ethi uqophe umlando ngokuphela konyakamali ngenyanga edlule unemali engango-R50 million esikhwameni.
“Ngosizo lwemenenja yethu, uMnu Sibusiso Bukhosini, sibona kukhanya kakhulu phambili. Ziningi izinguquko ezinhle kakhulu esesizenzile nesifuna abantu baseMkhanyakude, bahlomule kuzona ngoba lokhu kusho ukuthi intuthuko nezidingo zabo zizobhekeleleka,” kusho uMnu Mkhombo.
Ezinye izingqalasizinda ezakhiwe yilo masipala kubalwa iShemula Water Supply Scheme, ebe wu-R120 million, yiMpukunyoni Water Remedial, edle u-R10 million, yiHlabisa Mandlakazi Water Supply Scheme, edle u-R2.5 million.
Inkinga yamanzi eMkhanyakude indala lo masipala usaphethwe nguMnu Law-rence Mthombeni, we-IFP eminyakeni engaphezu kwewu-10 edlule.
Ubeyaye aveze ukuthi inkinga ngedamu laseJozini - kuze kube abantu abalakhele kabanawo amanzi - wukuthi liphethwe kuhulumeni omkhulu, othatha kude ukubhekelela abantu bendawo.