Ngubani onabalandeli abaningi; uNkulunkulu noma uSathane?
MHLELI: IBhayibheli leli liyinkombandlela yokukholwa ngubaba uNkulunkulu. Into engiyibuka ngalo wukuthi labe selakha umngcele ukuthi kungasolwa lutho okubhalwe kulona. Lokho phela sikubona kahle kuThimothewu ukuthi yonke imibhalo yaphefumulelwa nguNkulunkulu.
Ngamafuphi, yonke into eseBhayibhelini kumele ithathwe njengoba injalo futhi kumele ingaphikiswa. Kuyaxaka-ke ukuthi kube khona into engaphikiswa ngoba ngisho nohulumeni obusayo uyaphikiswa.
Into phela engaphikiswa isuke iwundlovukayiphikiswa. IBhayibheli liyaxaka ngempela ngoba kubuye kube nongabazane kulona kodwa kumuntu ojulile, hhayi kulabo abalibona lingenagcobho.
Yingakho kwasheshe kwavalwa ngoThimothewu ukuvimba ungabazane. Lokho-ke mina ngikuthatha njengobuhlakani obuhambisana nobuqili bababhali beBhayibheli.
Uma sizobhekisisa kahle, iBhayibheli lifike kahle ngempela abamhlophe bengene shiqe ngomkhono nangesiphanga, besiphuca umhlaba wobabamkhulu, umcebo wobabamkhulu, imfuyo yobabamkhulu nenkolo ebesidumisa ngayo uNkulunkulu.
Abelungu bansondo bafike bafenyisa amasiko nenkolo yama-Afrika kodwa kwagxishwa lena eyezizwe. Bonke njalo lobo buqhwaga benzeke ngezikhathi zobukoloni.
Ngezikhathi zobukoloni, akukho lapho okuvela khona ukuthi iBhayi- bheli lalikhuza ukuba abelungu bayeke ukusiphuca lokho okungokwethu. Lona lalishumayezana ngokuthi abantu mabaphenduke sibe sibhubha njalo. Okunye futhi engukubukayo, yindaba kaSathane.
Esikuphawula ngoSathane wukuthi kwakuyingelosi enkulu kaNkulunkulu. Ngamafuphi uSathane lona kwakuyisandla sokuphonsa sikaNkulunkulu. Siyathola ukuthi wathi uNkulunkulu edala kodwa uSathane yena wayebhidliza. Lokho ngokwamanje singathi uSathane wayeyiqembu eliphikisayo.
UNkulunkulu uyasuka uSathane umshovela emhlabeni aze athi, "Wo kuwena mhlaba!"
Mina ngiyamhlaba uNkulunkulu ukuthi uSathane wayemsaphi kithina bantu bakhe. Ingani uSathane wakwazi ukucela yena uNkulunkulu inselelo kangangokuba uNkulunkulu wabona kungcona ukuba asuse isinengiso phambi kwakhe. Yena umenzi wezinsuku umletha kithina kodwa ebe emazi kahle lo mfokazi ukuthi bebephazamisana kuphi naye!
Thina kwakumele ukuba simenzenjani uSathane uma ebhekana naye emehlweni?
Uyasuka futhi uSathane wansondo ucela inselelo indodana kaNkulunkulu, uyayilinga ngokuthi iguqule amatshe kube yizinkwa.
Lokho kusakhombisa isipiliyoni sikaSathane ukuthi wayiphiwa le nto yokuba namaqhinga. Kunento engibuye ngiyizwe abefundisi beduduza ngayo abantu bethi masingakusabi ukufa ngoba kuwukuphila. Baqhubeke bethi ukufa kwanqotshwa ngokufa kukaJesu ngoba wafa wavuka, ngokunjalo nathi siyofana naye uma sikholwa. Umbuzo-ke uthi kunqotshwe kanjani ukufa bebe abantu besafa? Ingani iBhayibheli lithi ukufa kakudalwanga nguNkulunkulu kodwa kwavela ngoba u-Adamu ne-Eva belingwe nguSathane, ngakho-ke umphumela wesono kwaba wukufa.
Lesi gwebo kasisapheli yini na? Ingani ngisho iziboshwa ezisatshwayo ushwele ziyawuthola. Bese futhi abefundisi beqhubeka nokududuzana bethi uSathane akanamandla. Umbuzo usekutheni ungasho kanjani ukuthi akanamandla?
Ingani bonke abonayo bakhala ngoSathane bethi balingwe nguye? Umfundisi otholakale ehlazweni umkhonto uwukhomba kuSathane.
Otholwe yinkantolo yomthetho ukuthi wephule umthetho, uthi ubelingwe nguSathane.
Kusho ukuthi uSathane uyabusa ngempela, hhayi kancane ngoba njengoba siphila ezinsukwni ezinzima kubulawana, kudlwengulwa, kudutshulwana, izingozi zemigwaqo konke nguSathane. Cha, uSathane ukhona futhi unamandla ngakho abafundisi mabayeke ukuphika umuntu ekhona.
Kwamanje nje, ngubani onabalandeli abaningi uSathane noNkulunkulu?