Ingwadla yehhovisi lomqoqi wentela
KWAMBULEKE elinye ikhasi ngokusabalala nokujula kwenkohlakalo osekukhulunywe kakhulu ngayo eNingizimu Afrika ngesikhathi kuchitheka igula lemiyalezo ye- e-mail okuphatheka kuyona amagama ezelamani zomndeni wakwaGupta nelikaMnu Tom Moyane, osamisiwe kwesokuba ngukhomishana weSouth African Revenue Services (Sars).
Okuthusayo ngalolu phenyo, yisithombe esivelayo sokuthi isithinta nehhovisi elibucayi njengelomemukeli wentela.
Okuyikhona okukhathazayo ngalokhu, wukuthi namanje akakabikhona onesithombe esiphelele ngomonakalo okhona nosazoba khona njengoba cishe usuku nosuku kuvela amanyala ngokukhwatshaniswa kwemali obekwenzeka ezigabeni eziningi zikahulumeni.
Lokhu sekuphoqe uMengameli Cyril Ramaphosa ukuba asungule ikhomishini eholwa yiJaji Robert Nugent ukuze liphenye ngenkohlakalo okusolwa ukuthi ibiyenzeka ngesikhathi sekufike uMnu Moyane kwaSars.
Okunye phakathi kwezinto eziwumonakalo esezenzekile kubikwa ukuthi:
kusukela ngoMbasa (April) 2014 kuze kube ngoNdasa (March) 2018 kuphethe uMnu Tom Moyane, umonakalo odalekile usuwenze leli hhovisi lasilela ngo-R50 billion emalini obekufanele liyiqoqe;
ukulahlekelwa kwezwe nehhovisi lomamukeli wentela - ngenxa yokuphatha budlabha nokugxambukela kwezepolitiki okuhambisana nobugebengu - kulinganiselwa ku R142 billion. Mhlawumbe kungenzeka lokhu kuguquke nxa sekuvela amanye amahlazo ayo belu le nkohlakalo.
ukuncipha kwesibalo sezisebenzi kuleli hhovisi kukhubaza imizamo yalo yokulwa nokugeleza kwemali kahulumeni ngezindlela zobumnyama, okwenza kuhushuke umnotho olinganiselwa ezigidini ngezigidi zamarandi.
Phakathi kwababiziwe ukuyofakaza kule khomishini yeJaji uNugent, nguNgqongqoshe wezemaBhizinisi kaHulumeni, uMnu Pravin Gordhan, oke waba yisikhulu esengamele kwaSars ngaphambi kokuba abeyilungu lekhabhinethi.
Osekuvelile kulolu phenyo wukuthi abasebenza ngaphansi kwehhovisi lomqoqi wentela bebephansi kwesimo sokwesaba nokwesatshiswa.
Okunye futhi okumangalisile kule khomishini wukubona omunye wabaholi be-Economic Freedom Fighters (EFF), u-Adv Dali Mpofu, emele uMnu Moyane. Sezizwakele izigi zika-Adv Mpofu - ngokubika kwabe-Eye Witness News - ekhononda ngokuthi uphenyo lwakwaSars oseluqalile kaluliphethe ngobulungiswa ikilayenti lakhe (uMnu Moyane).
Uthi lunjalo nje, lugcwele luchichima uhubhu kabhejane, ubona ukuthi empeleni kakufanele luqhubeke. Ukhomba ngenjumbane izikhulu zakwaSars ebezinukeka kulokho okwaziwa njengesigejane esingalawuleki (rogue unit) akholwa wukuthi yizona ezigqugquzele lolu phenyo.
Kukho lokho kukhononda, ugagula ngegama uMnu Gordhan, akholwa wukuthi unegqubu noMnu Moyane, eliphathelene nobutha obuphakathi kwabo ziqu. IJaji Nugent liyakuchitha okushiwo ngu-Adv Mpofu ngelithi ubufakazi bakhe buncike ezinkulumweni eziyinzwabethi.
U-Adv Mpofu umile kwelokuthi lokhu kuyiqiniso, ikilayenti lakhe elingazeseka ngokuthi le khomi- shini ichemile. Kakukabonakali ukuthi sizoba yini isiphetho salolu daba.
Kulindeleke ukuba iJaji Nugent likhiphe isinqumo salo ngalolu phenyo namuhla ngoMsombuluko ngo-14h00.