ASIFUNDE UKUZENZELA, SIYEKE UKUBA OKHANGEZILE
KUNEGCIWANE elihlasele abampisholo kulezi zinsuku, ikakhulukazi intsha yakithi.
Leli gciwane limayelana nokuhlale sinake noma sikhala ngabamhlophe ngokuthi bayizithiyo empumelelweni yethu.
Siyaye sithi sicindezelwe ngoba yibona abasaphethe izwe emikhakheni eminingi yempilo, nanxa thina bampisholo sathatha amandla ombuso ngo-1994.
Nasezikhungweni zemfundo ephakeme, okwakufunda kuzona abamhlophe bodwa ngesikhathi sobandlululo njenge-University of Cape Town (UCT), i-University of Witwatersrand ne-University of Pretoria, ukubala nje ezimbalwa, abafundi besebenzisana namaqeqebana osolwazi nezinye izifundiswa ezimpisholo, bakhala ngokucindezelwa.
Bagqugquzela izinguquko ezinqala okuhloswe ngazo ukulaxaza indlela yokufundisa yasemazweni asentshonalanga, kuthi esikhundleni sayo, kufakwe abathi ngeyase-Afrika ( decolonialization of education).
Yebo, izinguquko ziyadingeka kwesinye isikhathi, kodwa kulokhu kakucaci ukuthi yini ehloswe ukwenziwa lapha.
Ngesonto eledlule nje, abafundi abampisholo nabadlelana nabo base-UCT, bahlele isidlo sakusihlwa sabampisholo bodwa kulesi sikhungo, balibeka ngembaba elokuthi abamhlophe kabamukelekile ukuba babe yingxenye yalo mcimbi.
Ngenhlanhla iziphathimandla zishaye phansi ngonyawo, zathi imithetho yenyuvesi kayihambisani nokusetshenziswa kwama- bhilidi ayo ukuqhuba imicimbi egqugquzela ukubandlululwa nokucwaswa kwabantu ngokobuhlanga, okwenze ukuba lesi sidlo sigcine sibhuntshile.
Nasemabhizinisini nakwezomnotho yiso leso. Sihlale sikhala ngezinye izizwe sithi zisincisha amathuba ezinkampanini ezaziqalela zona, singabheki ukuthi kungani nathi singazizameli okwethu, sizimele njengoba kwakwenza izifundiswa zakithi nosomabhizinisi abampisholo ngesikhathi esinzima kusaphethe uhulumeni ononya wobandlululo.
Kasibukeli ngani emaBhunwini (Afrikaners), okwathi emuva kokuba ethathe izwe kuhulumeni wamakoloni wamaNgisi, aqala izinkampani zawo ezizimele nezombuso esizazi namhlanje njengoSanlam, Naspers, Transnet, Eskom nezinye, ebambisene nohulumeni wawo?
AmaBhunu akhuphula amasokisi, athuthukisa ulimi lwawo namanyuvesi esiBhunu imbala, njengeStellenbosch University nje, lapho izifundiswa zawo zaziqhamuka namasu nezindlela zokuthuthukisa isizwe sawo.
Kakuyona inhloso yale ngosi ukukhuthaza ukusebenza ngokuhlukana kwezinhlanga ezakhele leli ( separate development), njengoba kwakuhlose uhulumeni wobandlululo.
Inhloso wukuba abampisholo, abawumsinsi wokuzimilela eNingizimu Afrika, bafunde ukuziqhenya, ukubekezela nokuzenzela izinto ukuzithuthukisa bona nemiphakathi abahlala kuyona, kuphele ukuhlala sizibona siyizisulu ( victims) zezinye izizwe, sengathi sikhubazekile ngokwengqondo.
Inkinga ngokuhlala sizibona siyizisulu zezinye izinhlanga ezweni la siyiningi khona, wukuthi sekwenze abanye bethu bavika ngesithupha, basola ezinye izinhlanga esikhundleni sokuba bazinuke bona amakhwapha.
Yebo, izwe lethu lakhelwe yizinhlanga ezahlukene, kodwa kakuyona into embi ukuziqhenya ngobuwena nobuzwe bakho nokuzenzela izinto, ungahlale ukhangeze kwabanye.
Sidinga abaholi abakhuluma iqiniso bengananazi, abazokhuthaza ukuzenzela, ukuziqalela okwethu nokuziqhenya ngobuthina, singahlale sibheke ukuvuna ukudla okutshalwe ngabanye.