Amathemba kaNaith alele ku-African Night Sky
KUBUKEKA sekulele kuJustin Naith ukuzehlulekela ukunqoba iVodacom Durban July yalo nyaka njengoba kunguye onenqwaba yamahhashi aqokwe ukugijima kulo mjaho omkhulukazi eAfrika.
IVodacom Durban July izokuba ngempelasonto eGreyville Racecourse, eThekwini. UNaith unamahhashi ayisihlanu azokube egijima emjwahweni omkhulukazi, kanti ulandelwa nguSean Tarry yena onamahhashi amathathu. Ihhashi afolose ngalo uNaith ngu-African Night Sky okuyiyona mfivilithi ethenjwe ukuhamba nesicoco seVDJ.
U-African Night Sky uzokube egitshelwe nguGrant van Niekerk kanti ubekwe emzileni we-10 okungumzila omuhle kakhulu njengoba uphakathi nendawo.
Amanye amahhashi kaNaith abhekwe ngabomvu kulo mjaho ngu-ELusive Silva noStar Express.
Ngale kokuthi u-ELusive Silva uzokube egitshelwe nguBernard Fayd’Herbe okungujokhi onomlando omude weVDJ, leli hhashi nalo libekwe emzileni omuhle okungoka-14.
Nokho ihhashi elizobhekwa kakhulu ngamaphanta nguMade to Conquer nalo okungelakhe uNaith. Okubukeka kugqamile ngaleli hhashi wukuthi lizokube ligitshelwe nguJeff Lloyd ongujokhi owaziwayo kule nkundla.
ULloyd uyiwine yonke eminye imijaho emikhulu kanti yiVodacom Durban July kuphela angakayinqobi, nakuba esephume endaweni yesithathu izikhawu ezintathu emijahweni engu-8 yeVDJ aseyigijimile.
ULloyd uthatha umhlalaphansi ekugibeleni amahhashi ekupheleni konyaka kanti leli kuzoba yithuba elihle lokuvalelisa amaphanta ngokunqoba lo mjaho omkhulukazi. Leli hhashi lisemzileni we-12 kanti libukeka lizokhokha enhle imali ipulezi (place) newini yalo.
Amaphanta angaphinde abeke amathemba awo ku-Abashiri ozokube eqhoqhobelwe yinkakha enguPierre Strydom. Leli hhashi lisemzileni omuhle kakhulu okungowesibili.
Khonamanjalo, kumenyezelwe ukuthi ipulezi (place) lizokhokha kumahhashi ayisithupha angene phambili. Lokhu kusho ukuthi ungafaka ipulezi emahhashini afinyelela kwayisithupha kulo mjaho, njengoba kuvamise ukuthi ipulezi likhokhele amahhashi amathathu okuqala emjahweni.