Kukhalwa ngobugwala kubadlali bakuleli
Basolwa ngokutetema e-Europe
UBONGANI “Ben 10” Zungu ogijima kwi-Amiens SC yaseFrance ugxeka ubugwala ku-Andile Jali osanda kushiya iKV Oostende yaseBelgium wajoyina iMamelodi Sundowns asayine kuyona inkontileka ende.
UBen 10 uthi uJali bekumele aqhubeke nokulwela ijezi kwiOostende, aphinde azame nokuthola amadlelo aluhlaza kwamanye amaligi amakhulu ase-Europe kunokubuyela kwi-Absa Premiership.
Uthi ukholwa wukuthi iBafana Bafana ingenza kahle kakhulu ebholeni lomhlaba uma abadlali bakuleli bengazimisela, balwele ukuyodlala emaligini amakhulu e-Europe, bese bebuya kuleli sebeneminyaka eyevile kwengu-35.
“Nakuba ngingazazi izizathu eziqondile zokushiya kwakhe e-Europe kodwa ngikholwa wukuthi bekumele aqine, abhekane nanoma yiziphi izingqinamba. Bheka nje uKnowledge Musona (waseZimbabwe oke wadlala kwiKaizer Chiefs) usayibambile e-Europe,” kuphawula uBen 10.
Imenenja kaJali, uMike Makaab weProsport International, utshele leli phephandaba izolo ngeSonto ekuseni ukuthi umdlali wakhe ubuyiswe yizizathu eziningi kuleli.
“Phakathi kwezizathu ezibuyise uJali kuleli wukuthi ubefuna uku- dlala kwiCaf Champions League. Ubezimisele ngokubeka amakhokho ethala edlala kuleli. Usayine inkontileka yesikhathi eside kabi neSundowns. UZungu kumele agxile emsebenzini wakhe ahlukane phansi nabadlali bami,” kusho uMakaab.
Inkulumo kaBen 10 ifakazela ekaSteven “Schillo” Pienaar odlale iminyaka engaphezulu kwengu-10 e-Europe, owathi abadlali bakuleli bajabulela ukuba ngosaziwayo basezinxanxatheleni zezitolo zakuleli, hhayi ukuduma umhlaba wonke. Wathi besaba inselelo yokuhluphekela ijezi e-Europe azwakalisa ukuthi yikhona okuqinisa ukhakhayi futhi okungabumba iBafana.