UCaster uyaqhubeka nokuvelela emhlabeni
Usesondele ekuphuleni irekhodi lango-1983
KUBUKEKA zingamphazamisi kangako uCaster Semenya izindaba zomthetho omusha ohlongozwa yi-International Association of Athletics Federation (IAAF) wokuthi abasubathi abanama- hormone amaningi kunajwayeleke kwabesifazane bazonqatshelwa ukugijima nabanye. Lo mthetho kubhekeke ukuba uqale ukusebenza ngoLwezi (November).
UCaster ugile izimanga ephula irekhodi lakhe le-800m kwi-IAAF Diamond League ngoMgqibelo ebusuku eParis, eFrance. UCaster uqophe isikhathi esingu-1:54:25. Lesi yisikhathi sesine esisheshayo emhlabeni kwi-800m.
Ubecisha isikhathi sakhe sakuleli banga esingu-1:55:16 asenze ngo-2016.
Ukwenza kahle kwalo msubathi kuqinisa amathemba okuthi kakusekude ukuba aphule irekhodi lomhlaba kuleli banga okungu-1:53:28 eliphethwe nguJarmila Kratochvilova waseCzech Republic alenza ngo-1983. UJarmila ungomunye wabasubathi abafana ncimishi noCaster ngokwesakhiwo.
Udaba lobulili bukaCaster kubhekwe ukuba isinqumo ngalo sikhishwe yinkantolo yezemidlalo yomhlaba iCourt of Arbitration for Sport (Cas) njengoba i-Athletics South Africa (ASA) ilidlulisele kuyona ngemuva kokuba umhlangano we-IAAF ne-ASA ungabanga nazithelo ngeledlule.
ULuvo Manyonga naye wenze njengoba bekulindelekile edla ubhedu kwiLong Jump. Weqe ibanga elingu-8.58.
U-Akani Simbine izinto kazimhambelanga kahle njengoba engene isine kwi-100m, kwathi uHenricho Bruintjies wangena isithathu kwenye i-100m, uLuxolo Adams wenza u-20:21 engena isinekwi-200m.
ULebogang Shange wenze irekhodi elisha le-3000m Race Walk enza isikhathi esingu-11:03 ngoMgqibelo eSlovakia.
Imiphumela yeSama 10km ebiyizolo ngeSonto eKings Park Athletics Stadium, eThekwini, ihambe kanje, esigabeni esivulelekile kwabesilisa: 1.Bonginkosi Zwane (Boxer) 30:34; 2.Simphiwe Zulu (Hollywood Bets) 30:53; 3. Wiseman Mthembu (Amabutho) 31:15. Ku-40 kuya ku-49: 1. Simphiwe Zulu (Hollywood Bets) 30:53. Ku-50 kuya ku-59: 1.Michael Ndlovu (Zakhele) 36:01. Ku-60 kuya phezulu: 1.Sipho Lukhele (Mandeni) 44:56. Kumajuniya: 1. Wiseman Mthembu (Amabutho) 31:15.
Kwabesifazane: 1.Zama Mokoena (Nedbank) 39:30; 2.Nokuthula Ntshangase (Savages) 39:57; 3. Janene Carey (Boxer) 40:03. Ku-40 kuya ku-49: 1.Janene Carey (Boxer) 40:03. Ku-50 kuya ku-59: 1.Joanne Gibb (IND) 46:45. Ku-60 kuya phezulu: 1.Colleen Peens (Team Vitality) 50:03. Kumajuniya: 1. Marizelle Janse van Rensburg (Toti) 64:42.
Kwabahambayo kwabesilisa: 1. Aaron Mahlangu (Hollywood Bets) 48:52. Kwabesifazane: 1.Natalie Le Roux (Boxer) 57:46.