INJABULO KWI-KZNA NGABAQOKELWE KWEYOMHLABA
INJABULO kuMengameli weKwaZulu-Natal Athletics (KZNA) uSello Mokoena abasubathi besifundazwe abane beqokelwa emidlalweni yoMhlaba eyahlukene.
UZakithi Nene noCassidy Williamson baqokelwe kwi-Athletics World Cup ezokuba mhla ka-14 kuya ku-15 kuNtulikazi (July) eLondon, kanti uBongumusa Mthembu oyingqwele yeComrades Marathon noNkosinathi Duma ongene endaweni yeshumi bazomela elakuleli kwi-International Association of Ultrarunners (IAU) 100km engoMandulo (September) eCroatia.
UZakithi noCassidy bazokube benza iRelay eLondon. Ngemuva kwemidlalo yaseLondon uZakithi noCassidy bazomela elakuleli kwiCAA Track and Field eNigeria ngoNcwaba (August). UZakithi usesikhungweni seKZNA esizinze eThekwini.
“Ngijabule kakhulu ngokuqokwa kwabasubathi besifundazwe ukumela iNingizimu Afrika emidlalweni yomhlaba. Ngibonga kakhulu ukusebenzisana okuhle noMnyango WezeMidlalo wesifundazwe. Ngaphandle kwawo kasikho ndawo. UMthembu wenze kahle kakhulu evikela isicoco seComrades ekubeni wagila izimanga eSpain ngo-2016 ebuya nesiliva kwi-100km. Kangingabazi ukuthi uzoqhubeka lapho egcine khona.
“UDuma wenza kahle emabangeni amade, ngiyacabanga ukuthi uzosivala isikhala esivuleke ngesikhathi kushona uSimphiwe Ndlela obelithemba lethu. Ngibonga kakhulu nabaqeqeshi bethu abasebenza ngokuzikhandla ikakhulukazi uMichael Seme osesikhungweni sethu esiseNewcastle,” kusho uMokoena.
Selilonke iqembu lakuleli eliya eLondon lididiyelwe kanje, kwabesilisa: u-Akani Simbine; uClarence Munyai; uDerrick Mokaleng; uReinhart van Rensburg; uJerry Motsau; u-Antonio Alkana; uLindsey Hanekom; uChris Moleya; uNeil Giliomee; uLuvo Manyonga; uKgotso Mokoena; u-Orazio Cremona; uVictor Hogan; uTshepang Makhethe; uPhilmar Janse van Rensburg; uRosco Engel; uHenricho Bruintjies noZakhithi Nene.
Kwabesifazane: uCarina Horn; uJustine Palframan; uCaster Semenya; uRikenette Steenkamp; uWenda Nel; uJulia du Plessis; uChristy Nell; uLynique Beneke; uPatience Ntshingila; u-Ischke Senekal; uMargo Chene Pretorius; uSunette Viljoen; uTebogo Mamatu; uLente Pieterse; uCassidy Williamson; uTamsin Thomas; u-Ariane Nel noRorisang Ramonye.