Siyawubonga uhulumeni ngohlelo lwaseCuba
KUBE nenjabulo kubazali nakuHulumeni waKwaZulu-Natal kuleli sonto kubuyela emakhaya izitshudeni eziwu-260 ebezenza izifundo zobudokotela eCuba emuva kokufunda kuleliya lizwe iminyaka ewu-5. Lezi zitshudeni beziyingxenye yezinye ezidabuka kwezinye izifundazwe zakuleli, ezibuyele eNingizimu Afrika ngempelasonto emuva kokuphothula izifundo zazo.
Sezizotshalwa emanyuvesi afundisa ezobudokotela kuleli lapho zizofunda khona izinyanga eziwu-18, okuyothi nxa ziphumelela, zithole iziqu zobudokotela ngokugcwele.
Umnyango wezempilo usumemezele ukuthi uzothumela eCuba ezinye izitshudeni eziwu-700 ezizofundela ubudokotela ngonyaka ozayo ngaphansi kwalolu hlelo.
Silushayela ihlombe lolu hlelo lokuqeqesha odokotela, olwaqala ngo-1996, ngesikhathi ezempilo zisenganyelwe nguDkt Nkosazana Dlamini-Zuma - engungqongqoshe ngaphansi kukahulumeni kaMnu Nelson Mandela. Lwaqalwa noMnu Fidel Castro (ongasekho) owayengumholi waseCuba.
Yize silushayela ihlombe lolu hlelo kodwa sinesiphakamiso nesikhalo. Okuhle ngalo wukuthi selwandise isibalo sodokotela abampisholo kuleli, asebetshalwe ezibhedlela zikahulumeni, kwasizakala abantu bakithi abasebenzisa lezi zibhedlela.
Okunye okuhle wukuthi seluqeqeshe inqwaba yodokotela abampisholo, iningi labo eliqhamuka emindenini empofu, ababengeke balithole ithuba lokuqeqeshelwa lo msebenzi ngenxa yokungabikhona kwezikhala ezanele zokufundela ubudokotela emanyuvesi akuleli.
Okunye futhi okuhle wukuthi uma labo dokotela bengabantu abayazisayo imindeni abaqhamuka kuyona, lolu hlelo lungaba nomthelela wokutakula le mindeni enhluphekweni, njengoba sazi ukuthi imindeni yethu ijwayele ukwelekelelana, okuyinto enhle newubuntu.
Esikhala ngakho ngalolu hlelo wukuthi luyabiza, njengoba leli likhokhela uhulumeni waseCuba izigidi ngezigidi zemali ukuqeqesha laba bafundi.
Umbuzo oqhamukayo uthi kungani uhulumeni ungafaki le mali ayisebenzisa kulolu hlelo eminyangweni efundisa ezobudokotela emanyuvesi akuleli, yikhona lezi zikhungo zingakwazi ukwamukela umthamo othe xaxa wabafundi.
Okwenzekayo ngalolu hlelo wukuthi iNingizimu Afrika kayizakheli izikhungo eziyohlala zikhona ukuqeqesha ngisho izizukulwane, kodwa ixhasa ngemali izikhungo zaseCuba.
Okwenziwa wuhulumeni kuthi makufane nokunika abantu abaswele ukudla ukunokubafundisa ukulima ukuze ngelinye ilanga bezokwazi ukuzimela, bazondle. Yebo, iCuba isizile kakhulu, kodwa emuva kweminyaka ecishe ibe wu-20 lolu hlelo lukhona, sekuyisikhathi sokuba iNingizimu Afrika yandise izikhungo zokuqeqesha odokotela neminye imikhakha engandile, kunokuba kusetshenziswe inqwaba yemali kuthunyelwa abafundi kwamanye amazwe.