IFrance ivunwa wumlando kweyoMhlaba
Isethubeni lokuqukula le nkomishi okwesibili
KONKE kuvuna iFrance ngamathuba okunqoba iNdebe yoMhlaba ezosongwa ngowamanqamu ozokuba ngeSonto ngo-17h00 eLuzhniki Stadium, eMoscow, eRussia.
IFrance ingene kowamanqamu ngokuhlula iBelgium ngo-1-0 kwisemi-final ngoLwesibili ebusuku. Izobhekana nonqobe izolo ngoLwesithathu ebusuku phakathi kweCroatia ne-England. Womabili la mazwe kawakaze afinyelele kowamanqamu walo mqhudelwano.
IBelgium izodudulana nezwe elihlulwe izolo kowokubanga indawo yesithathu ngoMgqibelo ngo-16h00.
IFrance iqukule le nkomishi ngo-1998 ingosokhaya. Kulo mdlalo iFrance ixebule iBrazil ngo-3-0 kowamanqamu. IBrazil iyona ebivikela le ndebe ngalowo nyaka ngemuva kokudla ubhedu emqhudelwaneni obungo-1994 e-United State of America (USA).
IFrance ifinyelele kowamanqamu weNdebe yoMhlaba ngo-2006 eGermany.
Kulowo mdlalo ihlulwe yi-Italy ngo-5-3 sekukhahlelwa amaphenathi ngemuva kokuba umdlalo uphele zibambene ngo-1-1.
IFrance ihlulwe yiGermany ngo1-0 kwi- quarter-final ngo-2014 eBrazil. IGermany yiyona egcine iyizingqwele ihlula i-Argentina ngo-1-0 kowamanqamu. Nokho-ke nonyaka iGermany ikhishwe ekuseni nje- ngoba ihlulwe yiMexico ngo-1-0 kowokuvula yase inenebulwa yiKorea Republic ngo-2-0 kowokugcina wamaqoqo.
IFrance ivunwa yizinto njengoba ngo-2016 ifinyelele kowamanqamu we-Euro lapho ihlulwe khona yiPortugal ngo-1-0. Okunye okwenza izinto zivune iFrance wukuthi icijwa nguDidier Deschamps obeyibambe esiswini inqoba iNdebe yoMhlaba ngo1998.
UThiery Henry obeyisilomo seFrance, ubehleli ebhentshini leBelgium kulo mdlalo njengoba engomunye wamasekela kaRoberto Martinez waseSpain ocija leli lizwe.