Intukutheko kodonse iminyaka (14) engenacala
Uthi ufisa ukuhlangana nowesifazane owambophisa
UYAFISA ukuhlangana nowesifazane athi umbophele amanqina enyathi ngecala lokudlwengula, elimenze wabhadla ejele iminyaka ewu-14, okuvele emasontweni ambalwa edlule ukuthi wayengalenzanga nhlobo owesilisa wakwaJ, eMlazi.
UMnu Njabulo Ndlovu (35), obedonsa isigwebo sikadilikajele ngaleli cala, uthi uyafisa ukuhlangana nalona wesifazane noma engeke ambuze ukuthi kungani amhlanganisa nabantu abamenzakalisa.
Uthi njengamanje uzama ukuncenga inhliziyo yakhe ukuba imxolele lona wesifazane ngoba ethi noma yisiphi isizathu angasibalula, ngeke siyibuyise le minyaka ewu-14 echitheke ebhadla ejele.
Engxoxweni ekhethekile ILANGA elibenayo noMnu Ndlovu - elimfice ehleli kubo nabazali bakhe - uthi ukuba sejele kumkhulisile kwamenza waba yindoda ekhaliphile, kodwa akuyona indawo ayifisela omunye umuntu.
Uphume ejele ngoMsombuluko ngemuva kokuba inkantolo ithole ukuthi umsulwa ecaleni ayegwetshelwe lona.
Kutholakale ukuthi yonke le minyaka ebhadla ejele ubehlalele into angayenzanga, kunobufakazi obuningi obagodlwa ngesikhathi kuqulwa icala lakhe.
UMnu Ndlovu uphume ejele esezuze iziqu zeBachelor of Law (LLB) aboshwe enza unyaka wesibili kuyona eDurban-Westville University esiwuphiko lwe-University of KwaZulu-Natal.
Akathandi ukuxoxa kakhulu ngokwaholela ekutheni aboshelwe icala lokudlwengula. Icala lamlahla ngo-2005 usuyophela elungiselela izivivinyo zokuphela konyaka, waze wagwetshwa ngo-2006.
Bekuthiwa leli cala abeligwetshelwe ulenze nabanye abawu-5 - kushintshwana ngesisulu. Icala ligcine ligwebe yena nabasolwa ababili, okumanje basengaphakathi ejele, abathathu baphuma phambili.
Uveze ukuthi ummangali yintombazane abakhule nayo, indala kunaye, abazali babo besebenza ndawonye futhi bebehlala endaweni eyodwa.
“Ukuboshwa kwami kungikhulise kakhulu, kuthe noma icala selingilahlile - yize bengazi ukuthi kangilenzanga - kodwa benginethemba lokuthi ngelinye ilanga iqiniso liyovela. Obekungijabulisa kakhulu kukhona konke, wukuthi abazali bami bebekholelwa kimina futhi bengeseka,” kusho yena.
Uveze ukuthi basebenzise u-R50 000 kubameli bezama ukuveza ukuthi umsulwa.
UMnu Ndlovu uthi yize engalibambile igqubu ngento emehlele, kodwa usadiniwe, uyadinga ukuthola usizo lokwelulekwa ngokomqondo.
“Namanje kangikakholwa ukuthi ngisekhaya, ngihleli nabazali bami. Namhlanje ngivuke ngahamba nomama saya esontweni,” kusho uMnu Ndlovu.
Uthi ngesikhathi egwetshwa, ube nebhadi lokuthi athi efika ejele laseWestville wangahlala isikhathi eside, wadluliselwa eBhongweni, eKokstad, okuyijele elaziwa ngokugcina iziboshwa eziyingozi kakhulu.
Utshele ILANGA ukuthi uchithe iminyaka emithathu eBhongweni.
“Bekunzima ngempela ngesikhathi ngiseseBhongweni ngenxa yokuthi uma uvakashelwe yizihlobo uyohlangana nazo, uboshwa izandla nezinyawo,” kusho yena.
Uqhube wathi njengoba esekhululekile, uzimisele ngokusukuma azithathe, aqhubeke nempilo, anakekele abazali bakhe abanga- zange bamlahle ngesikhathi esebunzimeni, bachitha imali yabo eningi bezama ukuba aphume ejele.
“Kuhlengezela izinyembezi uma ngibona abangani bami, engangifunda nabo, sebephumelele begijima ngezimoto eziphambili, ngicabange ukuthi nami ngabe ngikude nempilo.
“Ngiphatheke kabi namhlanje ngihamba nomama siyogibela amatekisi siya esontweni, ngafikelwa wukuthi ukube kangiboshwanga ngabe umama ngimhambisa ngemoto esontweni. Kukho konke lokho nginethemba lokuthi uNkulunkulu ungibekele okukhulu ngempilo yami,” kusho yena.
Uthi uyafisa ukuthola isinxephezelo ngeminyaka eminingi ayichithe ejele.
Ebuzwa ukuthi ufisa ukunxeshezelwa ngesamba esingakanani, uthe konke lokho uzokuhlela nabameli bakhe.
UMnu Mbuso Ndlovu, onguyise kaNjabulo, uncome isibindi nobuhlakani bendodana yakhe.
Uthe ngesikhathi iboshwa bekungumfanyana nje obekhula kahle, ethanda isikole, enza konke okwenziwa ngabafana kodwa manje ubone olunye uhlangothi lwayo lokuba yindoda evuthiwe.
Uthi ubekhuleka njalo ukuba indodana yakhe iphume ejele, kuvele iqiniso njengoba sebesele nayo yodwa emhlabeni - umfowabo omdala sewashona.
Ngesikhathi ILANGA likwaNdlovu, abangani nezihlobo bebengena bephuma ukuzobona uNjabulo.
Imizamo yokuthola uMnu Luvuyo Mfaku, okhulumela iNational Prosecuting Authority (NPA), ukuzwa mayelana nalesi sinqumo esibukeka sizogadla kuzwele ephaketheni likahulumeni, iphunzile njengoba ucingo lwakhe belukhala lungabanjwa.