EZEMIDLALO: OweChiefs usole abadlali ngobugwala
IZINSONGO ezinzima ezibhekiswe kwiKaizer Chiefs ngobengumqeqeshi wayo ogcine exoshwe kabuhlungu kule kilabhu.
IChiefs izokwamukela iBloemfontein Celtic kowe-Absa Premiership ngoLwesithathu ngo19h30 eFNB Stadium, eSoweto.
Lo mdlalo ubhekwe ngabomvu ngabathandi bebhola njengoba bekholwa wukuthi uSteve “Mphathi” Komphela ( osesithombeni) ongumqeqeshi weCeltic uza negqubu njengoba efuna ukukhombisa izwe lonke ukuthi iChiefs imxoshele ubala.
Kuzokhumbuleka ukuthi uKomphela uphume ngesamagundwane eMoses Mabhida Stadium, eThekwini emuva kokuba ezakhe zihlulwe yiFree State Stars.
Abalandeli baze bashisa inkundla okwaba wukuhlukana kwakhe neChiefs.
Nokho lo mqeqeshi uthole ikhaya elisha kwiCeltic.
Selokhu efike kule kilabhu ugila izimanga njengoba ezakhe zishaya kwasani kwazise kazikaze zehlulwe kule sizini.
Zigcine ziguqise omkhaya bayo iChiefs, i-Orlando Pirates ngo-1-0 koweligi ngeledlule eFree State Stadium.
UKomphela uthi akayibambele gqubu iChiefs kodwa wabe eseyisongela kanzima njengoba vele ibhinjelwa yizinto.
IChiefs ayikanqobi mdlalo weli- gi selokhu kuqale isizini.
“Angithandi ukukhuluma ngokwenzeke phakathi kwami neChiefs nezizathu ezenze ukuthi kwenzeke okwenzeka kungcono sikhulume ngomdlalo.
"Ngisithokozele isikhathi sami khona yize singazange sizinqobe izinkomishi.
"Njengayo yonke imidlalo nalona siwulungiselele ngokweqophelo eliphezulu.
"Kodwa abantu okufanele bakuqonde wukuthi iningi labadlali bayo ngisebenzile nalo ngibazi njengoba ngizazi.
"Ngiyabazi lapho bebuthaka khona nalapho benamandla khona. "Ngizosebenzisa lolo lwazi ukuyibhubhisa lokho angikungabazi.
"Engingakusho nje wukuthi kukhona okusina kubajeqeza abantu bazobona into yamehlo kulo mdlalo.
"Lo mdlalo ngizokwenza ngawo wonke amandla enginawo ukuthi siwunqobe,” kusho uKomphela.
UGiovanni Solinas ololonga iChiefs uthi uyamhlonipha ngendlela eyisimanga uKomphela.
“Silindele umdlalo onzima kwiCeltic njengoba isefomini.
Indlela edlala ngayo uyabona ukuthi iqeqeshwa ngumuntu onolwazi olunzulu ebholeni yingakho ngimuhlonipha.
Kuzofanele siwuhlelele kahle lo mdlalo yize bona bebe nesikhathi esanele sokuphumula, bazobe besesimweni esihle kunathi,” kusho uSolinas.