Usole abadlali ngobugwala uSolinas
IChiefs izibeke ethubeni elihle lokudlulela kowamanqamu
UMQEQESHI weKaizer Chiefs uGiovanni Solinas usole abadlali bakhe ngobugwala ezakhe zibambana ngo-2-2 neSuperSport United emlenzeni wokuqala wesemi final yeMTN8 izolo ngeSonto ntambama eLucas Moripe Stadium, eTshwane.
Amagoli eChiefs ashaywe ngoKhama Billiat ngomzuzu ka-19 noLeonardo Castro ngoka-46, kwathi aweSuperSport wona ashaywa nguBradley Grobler ngoka24 nangoka-38.
La makilabhu azophinde atholane emlenzeni wesibili ngoMgqibelo ngo-20h15 eFNB Stadium, eSoweto.
USolinas okubukeka zisamvuna izinto kulo mqhudelwano, usole abadlali bakhe ngobugwala.
“Ngesiwombe sokuqala abadlali bami abazange badlale kahle neze bebegcwele ubugwala ububona nje ukuthi isibindi abanaso.
"Ngesesibili babuyelwe wukuzethemba, saqala sadlala ibhola elihle.
"Ngijabule ngalo mphumela yize besingenza kangcono.
"Ngokwami uBillait noCastro bangabadlali abahamba phambili kwiPremiership, akekho ofika kubona,” kusho uSolinas.
UKaitano Tembo ololonga iSuperSport uthi akukapheli ngabo.
“Kulo mdlalo sisuke sanaka uBilliat kakhulu wamane wasizakala wasinika inkinga.
"Ungumdlali oseqophelweni eliphezulu, lokho ngeke ngikuphike, kugqamile kulo mdlalo.
"Kodwa-ke akukapheli ngathi, sizobuya singcono kakhulu emzuliswaneni olandelayo,” kusho uTembo.
NgoMgqibelo ntambama, iMamelodi Sundowns iguqiswe yiCape Town City ngo-1-0 emlenzeni wokuqala we-semi final yeMTN8 eCape Town Stadium.
Igoli leCity lize ngonyawo lukaTariq Fielies ngomzuzu ka-75.
Ngijabule ngalo mphumela yize besingenza kangcono...