Bahloniphe uShenge ngenkundla
ULundi Stadium sekuyiPrince Mangosuthu Regional Stadium
UHLONISHWE ngokuba kuqanjwe inkundla enkulu yasoNdini ngegama lakhe uMntwana waKwaPhindangene, iNkosi Mangosuthu Buthelezi, okuqhubeka uchungechunge lwemigubho yokuhlanganisa kwakhe iminyaka ewu-90 egadula kulo mhlaba omagade ahlabayo.
Usuku lokuzalwa kweNkosi Buthelezi lunamuhla kanti kunomcimbi omkhulukazi wesizwe sakwaButhelezi lapho simeme khona abantu ukuba bayofinya ngendololwane. Mhla ka-31 kwephezulu kuzoba ne- gala dinner yokuvala le micimbi.
Ukuhlonipha iNkosi Buthelezi ngamagalelo ayo ewakhombise cishe emhlabeni wonke, uMasipala wasoLundi ushintshe igama lenkundla yendawo, Ulundi Stadium kwaba yiPrince Mangosuthu Regional Stadium.
Lokhu kumenyezelwe yimeya, uMnu Wilson Ntshangase ngoLwesihlanu esigcawini sabezindaba ebesisemahhovisi kamasipala.
“Sibone kubalulekile ukuba sifeze isiphakamiso somkhandlu sango-2007 esathathwa ngokuvumelana ukuthi wenze lokhu. Ngo2007 kube nelungelo lokuthi umasipala wendawo nowesifunda iZululand benze izinguquko ngezakhiwo ezingaphansi kwalezi zindawo.
Le nkundla yiyona ezobe isetshenziswa emgubheni wesizwe sakwaButhelezi ozoba namhlanje.
UMntwana waKwaPhindangene akakahlonishwa yiNingizimu Afrika njengabanye abaholi bamaqembu ezombusazwe kuleli, uma kuziwa kumntwana kuyashwampuzwa nje,” kusho uMeya uNtshangase.
Usomlomo, uNkz Joana Manana, ugxeke abezindaba ngokungabiki ngendlela ngamagalelo eNkosi Buthelezi.
“Uma ubuka umabonakude, kuba yisikhashana esincane usedlulisiwe uMntwana. Emaphepheni kubhalwa isiqeshana. Kungani kwenzeka le nto kwabezindaba?
“Sifisa ukubona uMntwana evezwa naye njengabanye abaholi bezepolitiki abahlonishwayo. Siyethemba ukuthi uzothatha umhlalaphansi iNkatha iphethe izwe eNingizimu Afrika. Sifisa abantu beyethembe ukuthi ingayishintsha impilo yabantu.
“Kuzomele sikhumbule ukuthi uMntwana ungowokuzalwa oNdini futhi useduze nezinhliziyo zethu, yingakho njengomkhandlu kumele simkhumbule,” kusho uNkz Manana.
IMenenja kaMasipala, uMnu Nkosenye Zulu, ituse amagalelo eNkosi Buthelezi, yathi kuningi okuhle ekubonile okwenziwe yilo mholi, kodwa abantu abaningi bafuna ukukushabalalisa, bakufake ngaphansi kwamatafula.
“Ngeke sikubalekele ukuthi uMntwana ubengelinye lamaqha- we asebenzele leli lizwe. EThekwini bebelokhu besikaza ukuqeda ngegama lomgwaqo, uMangosuthu Highway, okumanje kangazi sewabizwa ngani.
“Ngesikhathi sikahulumeni woMntwana (KwaZulu-Natal) kwasungulwa ibhange iThala ngenhloso yokuthuthukisa abantu abamnyama, kwakhiwa izimboni zokudala amathuba emisebenzi emadolobheni wonke kulesi sifundazwe, kwakhiwa izikole eziwu-6 000 neMangosuthu University of Technology kanti lo hulumeni wentando yeningi usakhe eziwu-36.
“Kuningi esingakubala okwenziwe nguMntwana esingambonga ngakho. Kulo masipala sisebenza ngobuqotho, sisebenzisa inkece yabakhokhi bentela ngendlela eyiyo ngoba sikufundiswe nguMntwana ukusebenza ngendlela kusizakale abantu,” kusho uMnu Zulu.
Namuhla kulindeleke ukuba izinkumbi zabantu abaqhamuka ezinhlakeni ezehlukene; okungabezepolitiki, ezenkolo, ubukhosi, isizwe sayo inkosi bagcwale ePrince Mangosuthu Regional Stadium.