UNWELE OLUDE SHENGE!
Isishabasheki sakoSokalisa Imisebenzi yaso emihle eyenze izimfamona Zanyipha kwangathi ziyasaliswa! Uliqhawe lamaqhawe elilwe izimpi ezinhle Uliqhawe elicathulise ingane empisholo ngemfundo, Abaningi bangodokotela namhlanje Abaningi bangabaholi abanohlonze kuyimanje ngenxa yemisebenzi yakho.
Bayingcosana abanobuntu njengawe Kuleli kloba lomlilo lepolitiki. Kwale noma izitha sezizama ukukucoboshisa Ziqede ngawe ngandlela zonke, Zaphuma ekamabuyaze ngoba usibekelwe ngefu elimhlophe elinamandla asezulwini.
Kuthe noma sezizame ukukugingqa Amahlandla amaningi Zisho ukuqeda ngeqembu lakho nangawe Kuso belu lesi sikhathi sikahulumeni wentando yeningi Wangaphenduka ingonyama evinjezelwe, Wahlala nazo etafuleni wamamatheka.
ULundi obekuthiwa lumahlikihli Lubekwe nguwena kwelomhlaba ibalazwe. Abanye abaholi balwela amathenda UShenge ulwela imfundo yompisholo. Isitha senkohlakalo! Ugagane olushiye iminjunju enhliziyweni kaNelson Mandela waze wahlambuluka, wathi uShenge yinsimbi kayigobi Okade kwasa sizama ukuyigoba Kodwa sagcina sigobe uphondo.
Hlanzani ngedela mavaka Agadla emadodeni efulathele, Ngeke nayenza lutho inkanyamba yakoShenge Ekhafula umlilo wesimilo Simile ezinhliziyweni zabanonembeza! Umaxoki amncoma ekusithekeni Ngoba ebulawa yingebhe yokuthi Uma eke amcoma esigcawini Ivoti liyowakhulumela isiGriki.
Uvemvane olumibalabala ekhanga Amazwe ngamazwe badle imihlathi abasekhaya. Imbali emile KwaPhindangene Yanuka izwe lonke wamemeza UJulius Malema wathi uzoyokhankasa khona Ngoba efuna ukunyathela kulo muzi, athole izibusiso. Khula Shenge, khula ukhokhobe, Uyihambile indlela ehlobe ngamadwala nameva Wayihamba kunzima kodwa ulokhu umamatheka. Shenge!