BABHIKISHELE UHULUMENI ABAZALI BEFUNA UKWAKHELWA ISIKOLE
BAVUKE umbhejazana ngoLwesine bakhipha abafundi emakilasini abazali bebhikishela ukuba kwakhiwe kabusha iManyampisi Primary School, eManaba, KwaMhlabuyalingana.
Lo mbhikisho ugcine usungenelwa yingxenye yabafundi. Kuphoqe ukuba uMnu Sipho Mthembu ongumhloli wezikole kule ndawo, amise zonke izinhlelo zakhe ukuze eyomukela uhlu lwezikhalo zomphakathi kulo mbhikisho.
Amalungu omphakathi amyalele ukuba angene emagunjini okufundela ukuze ezobona isimo sawo. Uthishanhloko wakulesi sikole, uMnu Michael Gumede, uthi sisungulwe ngo-1982. Ngesikhathi siqala bekufundelwa esontweni lamaRoma elisendaweni, okuthe ngawo lowo nyaka saqala ukuzimela.
Sinamagumbi ayi-5 akhiwe ngamalungu omphakathi kanti kunovalo lokuthi angawa noma yinini ngenxa yobudala bezakhiwo. Abazali bathe impendulo bayayifuna ngoMfumfu (October) mayelana nesicelo sabo sokwakhelwa isikole.
“Sihlale phansi sayibheka le nto, sabona kungcono ukuba si- bhikishe ukuze uhulumeni uzosilalela ngoba laba abanye abayizithunywa zawo, kabazimisele ngokusilalela uma sibacela kahle ukuba silungiselwe lesi sikole. Sicela ukuba uhulumeni ungenelele kulolu daba.
“Nathi safunda kulesi sikole sinje, othisha bethu bayalimala uma befundisa emakilasini kanti nabafundi bayaphela yizingozi. Abahlengikazi bethu bakhala ngokuthi izingane zingenwa yizifo. Kudala sihamba lolu daba lokwakhiwa kwalesi sikole kodwa senziwa inhlekisa,” kusho elinye ilungu lomphakathi.
UMnu Bhekamandla Ndlovu ongumzali, uthe: “Ezinsukwini ezimbalwa ezedlule, ngilinyalelwe yingane yami iphakathi ekilasini. Wonke amakilasi agcwele imigodi. Kuningi okusixakile lapha endaweni kodwa sicela bakuyeke konke lokho, balungise indaba yalesi sikole.
“Lilodwa nje igumbi elingumahamba-nendlwana abaliletha lapha. Uthishanhloko akanahhovisi nonogada yiso leso.”
ILANGA lixoxe nothisha ababili asebeke balimala ngenxa yemigodi esemakilasini. UNkk Major Gumede ongomunye walabothisha, uthe:
“Siyacela uhulumeni ulungenelele udaba lwethu kulesi sikole ngoba sithwele kanzima. Ngawa ngahlekwa yizingane.”
Okhulumela uMnyango wezeMfundo KwaZulu-Natal, uMnu Kwazi Mthethwa, ubonge abazali bakulesi sikole nomphakathi ngokubhikisha ngendlela enokuthula futhi ehlelekile.
Uthe udaba lokwakhiwa kwalesi sikole lusezithebeni zomnyango. Unxuse umphakathi ukuba ungesabi ukubikela umnyango uma kukhona izisebenzi zawo eziwubukela phansi.