Ubhoke ngolaka ebuzwa ngokudivosa
UMpisane uthe into ebalulekile kuye njengamanje yindodakazi yakhe
UBHOKE ngolaka uMnu Sbu Mpisane emuva kokuputshuka kwezindaba zokuthi uyahlukanisa nomkakhe, uNkk Shauwn Mpisane.
Iphephandaba lesiNgisi eliphuma ngeSonto, iCity Press, libike izolo ukuthi lezi ziqumama kazisadleli esitsheni esisodwa.
ILANGA lizamile ukukhuluma noMnu Mpisane ukuzwa kabanzi ngalezi zindaba kodwa walitshela ukuthi ucela ukuyekwa ngoba kuyimanje ingane yakhe, uSbahle, ibe sengozini yemoto emasontweni adlule, isezinhlungwini.
“Into ebalulekile njengamanje yingane yami esezinhlungwini esibhedlela, kodwa kayikho into engingayenza ngoba amaphephandaba ngonkulunkulu basemhlabeni,” kusho uMnu Mpisane obedinwe eqhuma.
I-City Press ibike ukuthi laba bobabili kabasalali endlini eyodwa. Kubikwa ukuthi uMnu Mpisane akasavumelekile ukungena emzini wakhe osendaweni yabadla izambane likapondo eThekwini.
Ngokusho kwaleli phephandaba, uNkk Mpisane kuyimanje umatasa nabameli uhlela isehlukaniso.
UMnu Mpisane ukhale ngokuthi amaphepha kawananembeza, kwazise ayazi ukuthi usezinhlungwini njengoba indodakazi yakhe isesibhedlela.
Uveze ukuthi ngeke awabonge amaphephandaba kodwa ubonga uNkulunkulu okunguyena ovuse ingane yakhe.
Utshele ILANGA ukuthi okwamanje ngeke akwazi ukuphawula ngenye into ngaphandle kwempilo kaSbahle.
“Engikujabulelayo wukuthi ingane yami iyelulama esibhedlela, okunye nokunye kanginendaba nakho. Namhlanje (izolo) uSbahle uvukile wacela ubaba wakhe. Ngithe uma ngifika wathi baba ngiyaxolisa,” kusho yena.
UMnu Mpisane nomkakhe yiziqumama ezaziwayo KwaZulu-Natal naseNingizimu Afrika yonke emikhakheni eyahlukene kubalwa nezemidlalo njengoba bengabanikazi beqembu likanobhutshuzwayo, iRoyal Eagles, nayo izinto ezingayihambeli kahle njengoba isihlulwe kuyona yomibili imidlalo yeNational First Division esayidlalile, okwenza ilale isibili ukusuka emsileni kwi- log yeNFD.