KUTHIWE UBENENHLIZIYO EMBI UMUFI
UCHAZWE njengomuntu obenenhliziyo embi owesilisa waseThornwood, eMariannhill, eThekwini, osolwa ngokugwaza abulale amalungu omndeni wakhe maqede wazilengisa.
UKhulekani Dude (21) kusolwa ukuthi ugwaze wabulala unina, uNkk Thembi Dube (57), intombi yakhe uNkz Philile Gumede (24), nengane yakhe enezinyanga ezintathu.
Kulesi sigameko kusinde indodakazi yakhe eneminyaka emibili.
Izidumbu zabo zitholakale sezonakele endlini ngeSonto eledlule emuva kokuba besekuphele isonto begcine ukubonakala.
UMnu Nhlanhla Ngcobo, obengumngani kaKhulekani, obekhuluma enkonzweni yomngcwabo yabafi ebisezinkundleni zemidlalo eThornwood izolo ngeSonto, umchaze njengomuntu obenonya futhi ephuza ukuxola.
“Kayingethusi into okuthiwa uyenzile, ifana naye ngoba ubengumuntu onenhliziyo embi. UKhulekani uqale ukushintsha emuva kokushona kukayise njengoba engene ophuzweni oludakayo nasezidakamizweni kanti ubesehlala ephethe ummese,” kusho yena.
Udadewabo kaNkz Gumede, uNkz Thobile Gumede, uthe (uPhilile) ufele emanyaleni njengoba ubekipitile noKhulekani.
“UPhilile ubengumuntu othanda ukuziphatha, uhambe ekhaya ngoba ekhala ngokuthi mina nomama sinemithetho eminingi futhi eqinile. Ngesikhathi ngigcina ukukhuluma naye, ngimcela ukuba abuye ekhaya, wathi ngeke abuye uzophuma ngebhokisi kwaKhulekani. Inhliziyo yami ibuhlungu njengoba sekwenzeke njengamazwi akhe,” kusho uNkz Gumede.
UMasipala weTheku usize imindeni ngezindleko zonke zomngcwabo njengoba kuthiwa ikhale ngokuthi kayinawo amandla okuzingcwabela.
IMeya yeTheku, uNkk Zandile Gumede, ithe ibuhlungu ngokwehlele lo mndeni.
“Silapha ukuzoqinisekisa ukuthi imindeni izofihlwa ngesizotha. Ingane esindile izonakekelwa yiminyango efanele. Abantu abasha kumele bafunde ukulalela abazali, bengazenzeli umathanda. Kule ndawo kumele kwakhiwe isikhungo sabantu abasha abazofundiswa khona ukuthi umuntu omusha uziphatha kanjani,” kusho uNkk Gumede.