UBEPHENYWA NGEZIQU ZOMGUNYATHI "OGWAZE" UMYENI BESOCANSINI
BELIPHENYWA ngokusebenzisa iziqu zomuntu osewashona isekela likathishanhloko waseMiddle Primary School, eMargate, elitholakale linamagxeba okugwazwa emzini walo, lishaya ngesudi yesele emini ngeSonto eledlule.
ILANGA lithole ukuthi uNkk Sindiswa Ntshingo, uMaBase, leli phephandaba elibikile ngaye ngoLwesine olwedlule, ubevulelwe icala emaphoyiseni aseMargate ukuze kuphe- nywe ngeziqu zakhe okusolwa ukuthi ngezomunye uthisha osewashona.
Leli phephandaba libike ukuthi kutholakala isidumbu sikaNkk Ntshingo simanxebanxeba nje, bekukade kuphume umyeni wakhe, uMnu Sihle Ntshingo, endlini egijima naye egwaziwe.
Kuvele ukuthi kunezinsolo zokuthi uMnu Ntshingo ugwazwe yinkosikazi yakhe ebithi izama ukumjunqa besocansini.
Kuthiwe yenze lokhu nje, yingoba ibisaba ukuthi uMnu Ntshingo angase athole ngodaba lweziqu zayo zomgunyathi - kwazise udaba bese luphume kwelinye iphephandaba eliloba ngesiNgisi.
Kubikwa ukuthi uNkk Ntshingo wethuke kwaphela nasozwanini, waswela nomgodi wokucasha, ngesikhathi efonelwa ngomunye wabangani bakhe emtshela ukuthi makathenge leli phephandaba lesiNgisi, kubha- lwe ngodaba lwakhe.
Umthombo weLANGA uthi kube yisikhashana nje ethole izindaba zokuthi kubhalwe ngaye ephepheni, kwabe sekuzwakala izindaba zokuthi useshonile.
“Siyasola ukuthi imethuse kakhulule le ndaba yokwazi ukuthi sekuyaziwa ukuthi usebenzisa iziqu zomuntu osewashona," kusho umthombo.
Imithombo yeLANGA engaphakathi emaphoyiseni iveze ukuthi uphenyo ngeziqu zikaNkk Ntshingo luqalwe ngo-2016 emuva kokuba efake isicelo sokuba nguthishanhloko kwesinye isikole esikuyona le ndawo. Bese luphothuliwe, sekulindelwe ukuba luyiswe kumshushisi ukuba akhiphe isinqumo ngalo. Kuthiwa kube sekufakwa icala emaphoyiseni ukuze ahlolisise kahle iziqu zakhe, okuthe uma kwenziwa uphenyo kwatholakala ukuthi usebenzisa iziqu zikathisha oshone ngo-2011.
Imithombo yaleli phephandaba iveze ukuthi kwenzeka konke lokhu nje, umyeni wakhe ubengenalo ulwazi lokuthi kunophenyo ngeziqu zomkakhe kanti naye uNkk Ntshingo ubengazi ngalo.
Okhulumela amaphoyisa KwaZuluNatal, uLt Col Thulazi Zwane, uthe likhona icala elivulwe ngo-2016 esiteshini samaphoyisa eMargate, kuphenywa ngeziqu zikaNkk Ntshingo.
Ukuqinisekisile ukuthi uphenyo bese luqediwe, sekulindwe umshushisi ukuba akhiphe isinqumo.