Iqatha selisemlonyeni
Bamhoxisile emsebenzini sebemqashile
UFUNA ubulungiswa owesilisa waseDondotha, eMpangeni, osola uMasipala waseMhlathuze ngokumbambisa udonga emuva kokwenza inhlolokhono yomsebenzi wokwakha waphumelela kodwa umasipala wamjikela esiswini.
UMnu uMzwandile Lamula (28), uthi lo masipala umncishe umsebenzi yize eyilandele yonke imigudu efanele yokufaka isicelo somsebenzi.
Iziqu ebezifuneka kulo msebenzi nesipiliyoni, uthi unakho, njengoba ethi uneNational Diploma kwiCivil Engineering no-N2 kwiPlumbing. Uthi useke wasebenza emnyangweni wezokuthutha - engumlekeleli kachwepheshe - bebheka isimo sokwakhiwa komgwaqo, okuwumsebenzi ofanayo nalo abewufakele isicelo kulo masipala.
“Ngifonelwe mhla ka-5 kuNtulikazi (July) 2018 emuva kokufaka isicelo kumasipala, kwathiwa kunenhlolokhono okumele ngiye kuyona mhla ka-11 kuNtulikazi. Ngiyile ngatshelwa ukuthi bazongithinta emasontweni amabili uma ngiwutholile umsebenzi.
“Bangishayele mhla ka-23 bathi ngiwutholile umsebenzi, mangifike mhla ka-30, ngiphathe zonke izimfanelo abazidingayo. Kuthe ngisalungiselela lokho, bafona futhi mhlaka -27 bathi kube yiphutha, lesi sikhala (abesesinikiwe) bebengakaqashi muntu kuso basezinhlelweni zokuqasha.
“Ngibuzile ukuthi kwenzeka kanjani lokho ngoba bangitshela ukuthi emasontweni amabili bayongifonela (mayelana nomsebenzi). UNomkhosi Mbatha ebengikhuluma naye, ucele ukubuye angifonele ngoba ezwa ukuthi imibuzo iyaqina.
“Esefona, uthe i-CV yami ingene ngephutha kwawalaba abathole umsebenzi, uma ngingazwisisi ucela ngiyokhuluma nomphathi wakhe, uNkk uGugu Mthembu. Naye (uNkk Mthembu) ungitshele ukuthi kube yiphutha lasemnyangweni oqasha abantu ngaphakathi kulo masipala,” kusho uMnu Lamula.
Utshele ILANGA ukuthi ufuna umasipala umnxephezele ngale nto oyenze kuyena. Uthe akasafisi ukusebenzela lo masipala ngenxa yokuthi usethole nezingcingo ezimesabisayo kuthiwa angalokothi alwe lolu daba lwakhe esebenzisa abezindaba ngoba lokho kuzokona igama lakhe.
“Inhloso yami, wukuthi banginxephezele, kuphinde kuvele nokwenziwa kwabanye ngoba bagcina bethula kanjalo bengasizakali,” kuphetha uLamula.
Okhulumela uMasipala waseMhlathuze, uMnu uMdu Ncalane, uthe bayalwazi udaba lukaMnu Lamula. Ukuvezile ukuthi ubeyingxenye yabantu abebekwinhlolokhono kodwa wangabe esawathola amaphuzu anele ukuze aqashelwe lo msebenzi.
“Umasipala ulandele yonke imigomo yokuqashwa kwabantu, into eyenzekile wukuthi emuva kwenhlolokhono amaphepha lawa ayesetshenziswa abuyiselwa ezisebenzini zikamasipala zathinta noLamula ngephutha, njengomunye wabathole umsebenzi.
“Ngesikhathi senhlolokhono, kuphumelele abantu ababili, hhayi uLamula. Emuva kwaleli phutha, ufonelwe watshelwa ukuthi kwenzeke iphutha.
“Uzile uLamula ukuzozwakalisa ukungenami kwakhe, ngokwemigomo yangaphakathi izisebenzi ezenze lokhu, zibhalelwe izincwadi zesexwayiso, okungenye yezindlela zokuqondiswa kobugwegwe uma isisebenzi sonile,” kusho uMnu Ncalane.
UMnu Ncalane uxolisele umasipala kuMnu Lamula, waphinde wakuqinisekisa ukuthi (uMnu Lamula) uhlanganile nesekela lemenenja yakwa- corparate services ukuzama ukuthola ngazo zonke izindleko zakhe ngesikhathi elungisa lolu daba.
Uthi uMnu Lamula uwashilo amanani ezindleko zakhe, wacela ukuba zikhokheleke ngoba iphutha libe sezisebenzini zikamasipala. UMnu Ncalane uthembise ukuthi uma kukhona isikhala somsebenzi esivelayo esifana nalesi uMnu Lamola abefake isicelo saso, uzophinde abizwe, okuyothi uma ephumelela inhlolokhono aqashwe.