Ukuvezwa kwale midlalo kuzoyitakula iSABC
SIYETHEMBA ukuthi ukuboniswa kwemidlalo yeBarclays English Premiership kwiSABC kuzoyitakula kakhulu le nhlangano esakazela umphakathi kwezemali. Kujabule isizwe iSABC imemezela ukuthi izobonisa imidlalo ye-premiership njalo ngoMgqibelo kuSABC 3. Owokuqala obukhonjiswa bukhoma ngobungoMgqibelo phakathi kwe-Arsenal neWest Ham United ogcine unqontshwe yi-Arsenal ngo-3-1. Kuzophinde kube nohlelo lokubuyekeza imidlalo ye-premiership njalo ngoLwesibili ebusuku.
Kulolu hlelo kuzotshengiswa imiphumela yayo yonke imidlalo ebigijinywe ngempelasonto. Sikholwa wukuthi iSABC izokwazi ukwenza inzuzo ngezikhangiso ngokubonisa le midlalo. I-SABC ingenye yezinkampani zikahulumeni ezidonsa kanzima kwezomnotho, futhi ikhungethwe yizinkinga zobuholi njengoba begxambukela kakhulu osopolitiki ekusebenzeni kwayo kwansuku zonke.
Ukubonisa le midlalo sibona kuzobuyisa isithunzi seSABC bese ikwazi ukuheha izinkampani ukufaka imali yezikhangiso.
I-SABC iyinhlangano edinga ukuphathwa kahle ngoba iyingxenye yomphakathi waseNingizimu Afrika. Okuhle ngokuboniswa kwepremiership kuSABC 3 wukuthi umphakathi wakuleli ontulayo usuzokwazi ukubuka ibhola lezinga eliphezulu mahhala.
Phela abantu ababuka ibhola laphesheya yilabo abakwazi ukukhokhela iDStv, okuyinto emba eqolo kwazise umphakathi wakuleli udla imbuya ngothi ngenxa yesimo somnotho esingawadali amathuba emisebenzi. Siyafisa ukuba imali ezotholwa yiSABC ngokubonisa le midlalo, iphathwe kahle ukuze kube nozinzo kule nhlangano. Bekungaba kuhle ukuba nosopolitiki bathi ukuma ukugxambukela - bangene ngomkhono nesiphanga - kwaSABC ukuze ibhodi nezisebenzi bezokwazi ukuqhuba umsebenzi ngaphandle kwengcindezi.
I-SABC ike yaphucwa igunya lokusakaza imidlalo yeAbsa Premiership ngenxa yobudedengu babaholi bayo. Siyethemba ukuthi kuzobethelwa izikhonkwane zaphakade ukuze bungapheli ubudlelwano beSABC neFootball Association yase-England.
Sibuncoma kakhulu ubuholi beSABC ngokuhlanganisa lesi sivumelwano. Mhlawumbe umphakathi usuzokhuthala ukukhokhela amalayisensi kamabonakude ngoba ubungasiboni isidingo njengoba imidlalo iboniswa ngemuva kwesikhathi yize isuke ivezwa bukhoma kwiSuperSport TV.
Okufanele abantu bakuqonde wukuthi iSABC ngeke ikhokhe ngisho indibilishi ngokusakaza le midlalo yaseEngland, izonikwa mahhala unyaka wonke ukuba iyisakaze bukhoma.
Bekungaba kuhle ukuba nosopolitiki bathi ukuma ukugxambukela kwaSABC...