MASINQANDWE ISIHLAVA ESENZEKA EMINGCWABENI YABAHLONISHWA
MHLELI: Kazi kwakhala nyonini emingcwabeni yezihlabani zemikhakha eyahlukene eNingizimu Afrika? Makuyekwe ukusetshenziswa kwemicimbi yokufihla abathandiweyo kithina, sihloniphe labo abasuke besemanzini ngokulahlekelwa.
Ukususa uthuthuva emngcwabeni kusho ukuthini kumuntu ompisholo njengoba sekuyinsakavukela umchilo wesidwaba? Omunye umndeni usuke ugutshuzelwe yifu elimnyama kodwa kube nezixhwanguxhwangu, izidungamcimbi, ezenza umathanda zingabi nandaba nophangalele.
Okwenziwe ngoMgqibelo kufihlwa uNkk Zondeni Sobukwe - obengumfelokazi kaMnu Robert Sobukwe, ongumsunguli wePan Africanist Congress (PAC) - ngiyokuxoxela amagwababa echobana, ngimfunge ubaba, Nkombose kababa.
Iyichilo elibi, elinuka phu. Kunedlanzana labalandeli bePAC elivumele uSathane walilawula, belifuna kuhambe ngentando yalo kukho konke okuthinta umama uSobukwe.
Kusuka efulegini ebelemboze ibhokisi kuya ohlelweni lomngcwabo, leli qeqebana belifuna ukuba kusingathwe yilona ngoba lithi ubeyilungu lenhlangano yalo. Umbuzo wami uthi, ngabe bayazicabanga yini izimfuno zomndeni wongasekho?
Nasemngcwabeni ka-Ahmed Kathrada, owayesishoshovu esibalwa nabashushiswa ecaleni laseRivonia ngokuzama ukuketula umbuso ngo1963, kwasuka izibhelu bethi kabamfuni uMnu Jacob Zuma, obengumengameli ngaleso sikhathi.
Kwaba kuhle nokho-ke ukuthi basigwema isimo bathi makangasondeli. Ngicabanga ukuthi nakulo mngcwabo, ohlangothini lwePAC bekungahlengeka ukuhlambalazeka komndeni wakwaSobukwe.
Ubaba Mangaliso Robert Sobukwe uyaphenduka ethuneni, akakutholi ukuphumula ngobulwane obenziwe yinhlangano akhothama eyilungu lokuqina layo. Makuhlonishwe labo abasuke bephelezelwa ngesizotha, banikezwe isikhumbuzo, baphelezelwe ngobumbano olungachemile, olungakhethi phela emasini.