UPitso unethemba ngomdlalo weCaf
Unxusa bonke abalandeli ukuba bazobaxhasa
UBALISA ngobunzima obubhekene nezakhe umqeqeshi weMamelodi Sundowns, uPitso “Jingles” Mosimane.
IDowns izobhekana neHoroya yaseGuinea koka- group C weCaf Champions League ngoLwesithathu ngo-19h30 eLucas Moripe Stadium, eTshwane.
IDowns iya kulo mdlalo nje, iguqiswe ngo-1-0 yiCape Town City emlenzeni wokuqala we- semi final yeMTN8 ngoMgqibelo ntambama eCape Town Stadium.
IDowns ibhekene nobunzima kulo mqhudelwano wase-Afrika njengoba kufanele noma kanjani iwunqobe lo mdlalo.
Isendaweni yesithathu ngamaphuzu awu-5, bese iHoroya yona ibe sendaweni yesibili ngawu-8.
Ukuze iDowns idlulele emzuliswaneni womkhumulajezi kufanele noma kanjani iwunqobe lo mdlalo.
Okunika iDowns ithemba ngalo mdlalo wukuthi ibuye nephuzu ekuhambeni ibambana nalo leli qembu ngo-2-2.
UMosimane uyabalisa ngesimo ababhekene naso.
“Uma ubheka umdlalo wethu neCape Town City ngenze izingu- quko eziningi ngenxa yobunzima bokuminyana kwemidlalo yethu.
"Ayikho into ebengingayenza, isimo siyasiphoqa ukuthi senzenjalo ngoba sidlala emiqhudelwaneni emithathu ehlukene.
"Umdlalo weHoroya kwawona uzoba nzima ngoba nayo inethuba lokudlulela esigabeni esilandelayo njengoba ingaphezulu kwethu.
"Engikumincele nje wukuthi ingafiki lapha ipake ibhasi.
"Ithuba lokudlulela emzuliswaneni olandelayo sinalo. Kufanele sizenzele thina umsebenzi, asisabhekile abanye abantu, konke kusezandleni zethu,” kusho uMosimane.
Ube esenza isicelo kubathandi bebhola bakuleli.
“Ayikho into enzima njengokuyodlala kulawa mazwe ngoba abalandeli bawo bayigcwalisa phama inkundla bese benithusa.
"Nami ngiyacela abathandi bebhola bakuleli baphume ngobuningi babo ukuzoseseka kulo mdlalo. Siyabadinga ngendlela eyisimanga.
"Ukudlulela emzuliswaneni olandelayo kulele kubona.
"Simele iNingizimu Afrika manje ngakho-ke sicela wonke umuntu azoseseka,” kucela uMosimane.