SITHI UNWELE OLUDE KWINKOSI BUTHELEZI! NGOSIBA LWESIKHULU SOSUTHU
NGOKUPHELA kwenyanga kuzovalwa ngokusemthethweni iwindi lokusayinisa abadlali ngaphansi kwe-Absa Premiership.
Sizamile ukuthi singangeni kakhulu emakethe ukuze singazitholi sesinabadlali abaningi abasha, kwazise sifuna inqubekela phambili.
Ukuba nabadlali abaningi abasha kuthikameza ithimba labaqeqeshi ekwenzeni umsebenzi ngokukhululeka.
Uma uqaphela ikilabhu siyikhande ngabadlali abaningi abasebancane nabambalwa abanesipiliyoni.
Kubadlali esibasayinisile abanesipiliyoni kube nguMoeneeb “Slimkat” Josephs ongunozinti noEmilliano Tade ophuma e-Argentina ukubala abambalwa. UBoalefa Pule obengunozinti ubuyele kwiSuperSport United njengoba besimboleke kuyona.
OKWENZEKA EKHEMPINI YOSUTHU
Kuyiqiniso elingephikwe ukuthi ngesikhathi unyaka uqhubeka nabadlali bayakhula yingakho sithathe isinqumo sokudedela uRhulani Manzini obengumgadli wethu.
Ukungasitholi isikimu kuyayikhinyabeza impumelelo yomdlali yingakho sibone kungcono simkhulule. Sivumelane kahle naye ngakho konke wahamba ngokukhululeka njengoba esejoyine iChippa United. Simfisela okuhle kodwa empi-lweni.
Njengamanje ngimatasa ngizama ukulungisa udaba lukaBongi Ntuli osemabhukwini eMamelodi Sundowns ozame ngawo wonke amandla ukusiza le kilabhu ezembeni ngo-2014.
Sizama ngazo zonke izindlela ukumboleka kodwa kube nombandela wokumthatha unomphelo uma kuphela isizini.
UNWELE OLUDE KWINKOSI UMNTWANA UMANGOSUTHU BUTHELEZI
Ngale mpelasonto sigubha ukuzalwa koMntwana waKwaPhindangene, iNkosi uMangosuthu Buthelezi ogubha iminyaka yobudala engama-90 esadla anhlamvana.
Leli sonto silithatha njengelikhulu kwikhalenda le kilabhu kanye nesizwe sonke nezihlobo ezisondelene naye. INkosi ibambe elikhulu iqhaza emzabalazweni nakwipolitiki.
Ngikholwa wukuthi umlando wakhe unothe kakhulu futhi intsha ingafunda lukhulu kuyena.
INkosi izalwa yiNdlovukazi uMagogo okuqanjwe ngaye iPrincess Magogo Stadium, KwaMashu enomlando omkhulu yingakho umlando wale nkundla ungasoze washabalala.
Iphinde ibe ngumshana weNkosi uSolomon kaDinizulu. Siyikilabhu sibone kungcono ukuthi ngalesi sikhathi sigqugquzele ukuziphatha kahle kubantu abasakhula nobunye. SiwuSuthu Olumabheshu Ankone sithi unwele olude Ndabezitha sengathi uMdali angakupha eminye iminyaka.
PRINCE MANGOSUTHU LEGACY CUP
Kuningi esizozama ukuqhamuka nakho kulo mqhudelwano wePrince Mangosuthu Legacy Cup. Ngikholwa wukuthi sizokwenza okuhle kodwa kulo nyaka.
Ngempelasonto esiya kuyona sizokuba nesithangami sabezindaba ukunekela isizwe konke okuzokwenzeka.
Sihlela ukuveza ukunotha kweZululand kwezokuvakasha nokukhombisa izwe lonke okuhlabahlosile okuphethwe yile ndawo eyikhaya neyihlalankosi lesizwe sethu. Ngikholwa wukuthi amakilabhu esizowamema azokwazi ukuba yingxenye yalo mqhudelwano.
Lo mqhudelwano uzokuba zili-12 usongwe zili-14 kuMfumfu (October).
Sifuna ukwenza ingqophamlando ngalezi zinsuku abantu abangasoze bayikhohlwa.