Benze kahle abaseKZN kwiMandela Marathon
Abesifazane abathathu bangene nabayishumi bokuqala
BENZE kahle abasubathi baKwaZulu-Natal besifazane kwiMandela Marathon ebiyizolo ngeSonto isukela eManaye Hall, eMbali yasongwa eMandela Capture Site, eHowick.
Lo mjaho ubuhlukaniswe amahlandla amathathu obekuyi-42km eqale eMbali kwathi i-21km yaqala kwiHalf-Way ye-42km kwathi i-10km yaqala ezinkundleni zemidlalo eHowick.
Ingqwele yalo mjaho kwabesilisa kube nguSintayehu Yinesu wase-Ethiopia oshaye intambo ngesikhathi esingu-2:28:05 ehluleka ngemizuzwana embalwa ukuphula irekhodi lalo mjaho u-2:27 eliphethwe nguThobani Chagwe alibeke ngo-2014.
Indawo yesibili ithathwe nguMabuthile Lebopo waseLesotho kwathi uMark Oyugu waseKenya wangena isithathu.
Umsubathi wokuqala waseNingizimu Afrika kube nguSiyabonga Nkonde osubathela e-Ethe- kwini Athletics Club kaMbhishobhi uVusi Dube.
UNkonde ungene unombolo 5 ngesikhathi esingu-2:32:28 wahlomula ngomklomelo ka-R10 000 ngokuba ngowokuqala wakuleli no-R5 000 ngokungena kuqala kwabesifundazwe, no-R12 000 wokungena unombolo- 5.
Kwabesifazane abasubathi abenze kahle nguMakhosi Mhlongo ongene unombolo 4 kulo mjaho othathwe nguLoice Jebet waseKenya kwathi uNontokozo Mkhize noPuleng Khumalo oqeqeshwa nguXolani Mabhida opheka uBongumusa Mthembu bangena unombolo-7 nakweyeshumi ngokwahlukana.
UMabhida uthe ujabule kakhulu ngokwenza kahle kwabasubathi bakhe kanti omunye owenze kahle nguNdumiso Sokhela ongene unombolo-9.
UMabhida uthi beze kulo mjaho ngenhloso yokuzohlola abasubathi bakhe. Uthi uzobaqala ngeTwo Oceans Marathon bese bedlulela kwiComrades Marathon uma sebeziqeqeshe ngokwanele. USokhela uthi ugqugquzelwe nguBongumusa Mthembu.
IMeya yaseMgungundlovu, uThobekile Maphumulo ithe ijabule kakhulu ngokwenza kahle kwabasubathi besifazane besifundazwe ikakhulukazi abesimame baseMgungundlovu.
Uthi banesifiso sokunyusa imiklomelo yalo mjaho wukuthi basashaywa yisimo somnotho. Uphethe ngokuthi bangakujabulela ukubona isibalo sabagijimi balo mjaho senyuka, sifike kweLondon Marathon neNew York City Marathon.
Le mijaho kuthiwa iheha abagijimi abangu-42 000.
Abakwa-Absa abangabaxhasi balo mjaho behlangene nabakwaLion Match bavule igumbi lezingane esibhedlela e-Edendale.
Isiyonke imiphumela yalo mjaho ihambe kanje, esigabeni esivulelekile kwabesilisa: 1. Sintayehu Yinesu 2:28:05, 2.Mabuthile Lepopo 2:29:11; 3.Mark Oyugu 2:31:03; 4.Justin Chesire 2:31:07; 5. Siyabonga Nkonde 2:32:28; 6. Tebogo Noosi 2:32:37; 7.Lyno Mucheno 2:32:42; 8.Kebede Dinke 2:32:53; 9.Ndumiso Sokhela 2:33:25; 10.Tekletsion Tefera 2:33:50.
Kwabesifazane: 1.Loice Jebet 2:50:01, 2. Selam Abere Alebachew 2:53:22 3. Tsega Galani Reta 3:03:25; 4.Makhosi Mhlongo 3:04:08; 5. Jenniffer Koech 3:o5:09; 6Loverness Madziva 3:11:49; 7. Ntokozo Mkhize 3:19:23; 8.Nandi Zaloumis-mitchell 3:24:10 9.Bearly Makokha 3:29:26 10.Puleng Khumalo 3:29:45.
* Kwi-21km kwabesilisa: 1. Bwernard Bill 1:02:23; 2.Jobo Khatoane 1:02:25; 3.Elroy Gelant 1:02:48; 4.Slindile Gubese 1:02:58; 5.Lebenya Nkoka 1:03:24; 6.David Munja 1:03:39; 7.Sibusiso Nzima 1:03:47; 8.Tebello Ramanyoana 1:03:54; 9.Namakoe Nkhasi 1:04:02; 10.Gladwin Mzazi 1:04:21.
Kwabesifazane: 1.Mamarolla Tjoka 1:18:47; 2.Nolene Conrad 1:18:57; 3.Jenet Mbhele 1:19:30; 4. Rutendo Nyahora 1:20:01; 5.Rudo Mhonderwa 1:22:21.