USHONELE EMLINDELWENI
SIMUNCU isimo emndenini wakwaNtshiza, KwaDabeka, emuva kokuba inkonzo yomlindelo izale enye ngesikhathi kudutshulwa kubulawa umshana wakhona kunomlindelo kaninalume okuthiwa ubulawe ngeledlule.
Kuthiwa umsolwa ugasele enkonzweni yomlindelo kaMnu Themba Ntshiza ngoLwesihlanu wadubula amalungu amabili alo mndeni, okukhona kuwona uMnu Sizwe Dion Ngubane (23) oshonile.
UMnu Ntshiza ubengenelwe ngabantu abangaziwa endlini yakhe, bavulela ngenhlamvu washonela khona lapho. Ngosuku lomlindelo, kuthiwa umufi nesinye isihlobo sakhe bebesanda kuphuma nje etendeni ngesikhathi kuqhamuka umsolwa evulela ngenhlamvu ebhekise kubona.
Kuthiwa baphuthunyiswe esibhedlela okuyilapho uSizwe eshonele khona kanti lona omunye kwembulwa kwembeswa kuyena esibhedlela.
UMnu Velo Ngubanem onguyise kamufi, uthi ugqemeke engeqiwa ntwala ngokubulawa kwendodana yakhe. Uthi yize engayazi imbangela yokudutshulwa kwayo, kodwa uyasola ukuthi kuhlobene nokubulawa kukaninalume (uMnu Ntshiza).
“Uma ngizwa, ngaphambi kokuba uninalume abulawe, uke wakhonjwa ngesibhamu ngomunye umfana endaweni ngoba ethi uyathakatha. Uyile emaphoyiseni eyobika kodwa watshelwa ukuba makaye kwiCommunity Police Forum ngoba ubesolwa ngokuthakatha. Ukwenzile lokho kodwa ngalo lolo suku wangenelwa ngabantu abangaziwa esendlini yakhe bamdubula washona,” kusho yena.
Uthi unezinsolo zokuthi ababulali bendodana yakhe benze lokhu ngoba bezitshela ukuthi ibabonile ngesikhathi bebulala uninalume.
“Yize ngisalinde uphenyo lwamaphoyisa, kodwa ngiyasola ukuthi abantu abenze lokhu bebezitshela ukuthi indodana yami ibabonile begila lo mkhuba. Ngikusho lokhu ngoba akukho okunye engingakucabanga obekungenza ibulawe ngosuku umndeni wayo usazilile futhi akekho ebixabene naye,” kusho yena.
Okhulumela amaphoyisa KwaZulu-Natal, uColonel Thembeka Mbhele, uthi kuvulwe amacala amabili, elokuzama ukubulala nelokubulala.