UMUFI UBETHATHWE "NGAPHANDLE KWEMVUME"
KUVELA okusha ngentombazanyana eshone ngeledlule isha nomjondolo ebilele kuwona emuva kokuba uninakhulu elandele isoka lakhe abexabene nalo eMountview, eVerulam, ngoMgqibelo.
Sekuvele ukuthi uMelokuhle Mkhize (4) ( osesithombeni) ushona nje, ubethathwe kubo kayise eNsuze ngaphandle kwemvume.
Kuzokhumbuleka ukuthi ngoMsombuluko ILANGA libike kabanzi ngalolu daba. Kulolu daba kubikwe ukuthi ngesikhathi uninakhulu kaMelokuhle, uNkz Nokuthula Mbuyisa (35), ephuma elandela isoka lakhe, ushiye ikhandlela esitsheni se- yoghurt, okusolwa ukuthi sithungeleke ngomlilo.
Kulesi sigameko kushe nezingane ezimbili zikaNkz Mbuyisa, okuthiwa zikhishwe ngomakhelwane emuva kokuzizwa zikhala zicela usizo.
Emuva kokuba ILANGA libike ngalolu daba, umndeni wakwaJali, lapho kuzalwa khona uyise kaMelokuhle, uzifikele mathupha emahhovisi aleli phephandaba waveza ukuthi ingane ishona nje, ithathwe iyovakasha eMountview kodwa yangaphinde yabuya.
UNkz Bongiwe Jali, onguninakhulu kaMelokuhle, uthe: "Ngikhumbula kahle ukuthi bafika ekhaya ngoNhlolanja (February), bayilanda njengomuntu oyovakasha isikhashana bese bembuyisa. Sixakiwe uma sekudlule isikhathi ingane ingasabuyi.
"Kuyimanje umndeni wakubo kanina ususinikeza izindleko zomngcwabo njengoba uthi ngeke ukwazi ukuyifihla, kwazise kawunawo amandla. Ukuba ingane kabazange bayithathe, ngabe iyaphila,” kusho yena.
Uthi nabo basacele usizo ekhanseleni njengoba kungekho osebenza into eqondile.
UNkz Londiwe Mbuyisa, ongudadewabo kaninakhulu kaMelokuhle, uthi unina wengane wayilanda ngoba uNkz Jali ekhale ngokuthi uyehluleka wukuyithengela amanabukeni alahlwayo.